Erna Solberg

Erna Solberg
Erna Solberg i 2016 Foto: Tore Sætre
Fødd	24. februar 1961 (63 år) Bergen
Statsborgar av	Noreg
Parti	Høgre
Yrke	politikar, statsminister
Utdanna ved	Universitetet i Bergen Langhaugen videregående skole
Ektefelle	Sindre Finnes
Verv	Statsminister i Noreg 16. oktober 2013–14. oktober 2021
Føregangar	Jens Stoltenberg
Verv	Parlamentarisk leiar for Høgre 9. oktober 2005–30. september 2013
Føregangar	Oddvard Nilsen
Etterfylgjar	Trond Helleland
Verv	Leiar for Høgre 9. mai 2004–
Føregangar	Jan Petersen
Verv	Kommunal- og regionalminister 19. oktober 2001–17. oktober 2005
Føregangar	Sylvia Brustad
Etterfylgjar	Åslaug Haga
Verv	Kvinnepolitisk leiar i Høgre 10. april 1994–29. mars 1998
Etterfylgjar	Sonja Sjøli
Alle verv	Norsk kommunalminister (2001–2005) stortingsrepresentant (1989–1993) Norsk statsminister (2013–2021) stortingsrepresentant (2017–2021) stortingsrepresentant (1993–1997) stortingsrepresentant (1997–2001) stortingsrepresentant (2001–2005) stortingsrepresentant (2005–2009) stortingsrepresentant (2009–2013) stortingsrepresentant (2013–2017) partileiar (Høgre, 2004–) stortingsrepresentant (2021–)

Erna Solberg (fødd 24. februar 1961) er ein norsk politikar for Høgre. Ho var statsminister i Noreg frå 2013 til 2021. Solberg har vore partileiar i Høgre sidan 2004, og vart vald inn på Stortinget frå Hordaland sidan 1989. I 2005 vart ho òg parlamentarisk leiar. Solberg var leiar i Høgrekvinner sitt Landsforbund 1993–1994, kvinnepolitisk leiar i Høgre 1994–1998, kommunal- og regionalminister 2001–2005 og første nestleiar i Høgre 2002–2004.

Liv og virke

Bakgrunn

Erna Solberg vart fødd i Arna, som den gong var ein del av Haus kommune, i 1961 som dotter av konsulent Asbjørn Solberg (1925–1989) og kontorfullmektig Inger Wenche Torgersen (1926–). Faren var tilsett i Bergen Sporvei, og Erna Solberg voks opp som den mellomste av tre søstrer. Ho var først elev ved Nygård skule. Med dysleksi var ikkje skulegangen utan vanskar, men ho fekk først påvist diagnosen som 16-åring, og naut godt av sterke muntlege evner. På fritida var ho skulemusikant og aktiv speidar i KFUK, og tok pianotimar.

Solberg har studiekompetanse frå Langhaugen vidaregåande skule frå 1979. Ho er utdanna cand. mag. med mellomfag i sosiologi, mellomfag i samanliknande politikk, kurs i statistikk, mellomfag i sosialøkonomi og hovudfagskurs i statsvitskap frå Universitetet i Bergen frå 1986. Ho har òg deleksamen frå hovudfag i sosialøkonomi frå same universitet frå 1988.

Erna Solberg har vore gift med siviløkonom Sindre Finnes (1964–) sidan 1996, som tidlegare har vore både tilsett og tillitsvald i Høgre, og saman har dei to born. For sitt bidrag i heimen vart Finnes kåra til «Årets mann» av Høgres Kvinneforum i 2002. Familien har vore busett både i Rådal i Bergen og i Oslo.

Karriere

Lokalpolitikar

Allereie som gymnasiast tok ho på seg verv som medlem av arbeidsutvalet i Bergens Unge Høgre 1978–1979, leiar for Operasjon Dagsverk i 1979, medlem av sentralstyret i Norges Gymnasiastsamband 1979–1980 og elevrepresentant i Rådet for vidaregåande opplæring 1979–1980. Solberg var seinare lønna sekretær i Operasjon Dagsverk 1983–1985.

I studietida hadde Solberg ei rekkje tillitsverv som varamedlem av Bergen bystyre 1980–1983, medlem av Bergen skulestyre 1980–1983, formann i Bergen Unge Høgre 1980–1982, nestformann i Hordaland Unge Høgre 1980–1981, formann i Bergen Konservative Studenterforening 1985–1986, formann 1985–1987 og nestformann 1987–1989 i Sandviken Høgre, medlem av arbeidsutvalet i Bergen Høgre 1986–1988 og valkampleiar i Bergen Høgre framom bystyrevalet i 1987. Etter valet tok ho sete som medlem av bystyret og varamedlem av formannskapet fram til 1989, da ho vart friteken frå verva.

Stortingsrepresentant

Som kommunal- og regionalminister arbeidde ho særleg for eit styrkt velferdstilbod innanfor ei ramme av færre og sterkare kommunar, i tillegg til regionalt samarbeid på tvers av fylkeskommunane. Ho reformerte òg den norske asyl-, flyktning- og innvandringspolitikken, og etablerte ein fungerande praksis for rask behandling av asylsøknader utan grunnlag. Sidan ho tiltredde som partileiar i 2004, har Solberg særleg vektlagt den sosiale delen av – og det verdimessige grunnlaget for – Høgre sin politikk. Partiet har òg teke ei meir utprega pragmatisk retning.

Etter stortingsvalet i 2009 steig oppslutninga rundt Høgre som parti og Solberg som statsministerkandidat mykje på meiningsmålingane. Kommunestyre- og fylkestingsvalet i 2011 vart Høgre sitt beste sidan 1979. Framom stortingsvalet i 2013 var det eit uttalt mål for Høgre å danne ei koalisjonsregjering mellom Høgre, Framstegspartiet, Kristeleg Folkeparti og Venstre med Solberg som statsminister. Resultatet vart ei regjering med Frp og Høgre som hadde ein avtale med Venstre og Krf i Stortinget. Etter Stortingsvalet 2017 hadde Solberg framleis det parlamentariske grunnlaget for regjeringa si, og Venstre vart del av regjeringa i byrjinga av 2017. Hausten 2018 vedtok Kristeleg Folkeparti å forhandle om å gå inn i regjeringa dei med.

Skandalar

Hausten 2023 vekte ektefellen hennar, Sindre Finnes, åtgaum etter at det vart kjent at han hadde utført 3 643 aksjetransaksjonar medan Solberg var statsminister; dette medførte at Solberg var inhabil i somme saker medan ho var statsminister. Sentralstyret til Høgre har uttrykt sin tillit til Erna Solberg.

Utmerkingar

I 2005 vart Solberg utnemnd til kommandør av St. Olavs Orden.

Bakgrunnsstoff

Wikifrasar har ei sitatsamling som gjeld: Erna Solberg

Commons har multimedium som gjeld: Erna Solberg

• Offisiell nettstad
• «Erna Solberg». Stortinget.no. 

• Erna Solberg i Norsk biografisk leksikon