Pisa
.JPG)
Pisa es un site en la rejion Toscana de Italia sentral. Lo monta la rio Arno, apena do la rio esflue en la Mar Liguria. Lo es la capital de la provinse de Pisa. An ce Pisa es famosa per sua tore apoiada (la tore de campaneria de la catedral de la site), la site de plu ca 90 mil abitantes (sirca 200 mil en la area urban) conteni plu ca 20 otra eglesas istorial, alga palasios medieval, e pontes variosa supra la Arno. Multe de la arciteta de la site ia es finansiada par sua istoria como un de la republicas maral la plu susedosa de Italia.
La site es ance la loca de la Universia de Pisa, cual ave un istoria cual estende a la sentenio 12, e lo ance ave la Scuola Normale Superiore di Pisa, fundida par Napoleon] en 1810, e sua enfante, la Scuola Superiore Sant'Anna, un de la plu respetada universias en Italia.
La orijin de la nom "Pisa" es un misterio. On ia sujeste variosa ce la pelasgos, la elenicas, la etruscas, e la ligurianes ia es la fundores de la site, per esemplo, como un colonia de la site antica de Pisa en Elas. Restas arceolojial de la sentenio sinco aec ia mostra ce la esiste de un site a la mar cual ia intercambia con la elinicas e la galos. La esiste de un necropoli etrusca, descovreda en escava en la Arena Garibaldi en 1991, suseste forte ce la site ia es fundida par la etruscas. La leteratur elinica ia dise frecuente ce lo ia es un site multe antica.
Pisa ave un istoria multe interesante, con multe cambias de rena: Lo ia es un parte de la Republica Roman, 180 – 27 aec, e de la Impero Roman, 27 aec - 476 ec. Lo ia es un parte de la Rena de Odoacer, 476 ec – 493, cual es comun usada como un marca de la fini de la Impero. Ma lo ia es concistada par la ostrogotos, e deveni un site de la Rena Ostrogoto, 493 – 553. La Impero Roman Este ia reclama lo per un dui sentenio, 553 – 603, cuando lo es clamada par la Rena Lombarda, 603 – 773. Carlos la grande ia concista lo e ia rena 774 – 812. Lo deveni la Marcia de Toscana como un parte de la Impero Roman Santa, 812 – 1000.
Lo ateni autonomia como la Republica de Pisa per plu ca cuatro sentenios, 1000 – 1406, ma es asorbada par la Ducia de Firenze, 1532 – 1569, e alora la Ducia Grande de Toscana, 1569 – 1801. Per ses anios, lo ia es un parte de la Rena de Etruria, 1801 – 1807, e donce ia es asorbada en la Impero Franses, 1807 – 1815. Lo deveni un parte de la Ducia Grande de Toscana denova, 1859 – 1860. Pisa ia es incluida en la Rena de Italia, 1861 – 1946, e pos la Gera Mundal Du, en la Republica de Italia, 1946 a la presente.