Urang Lauje
Urang Lauje marupokan salah satu suku di Indonesia nan sabagian gadang manatok di Kabupaten Donggala, Provinsi Sulawesi Tengah.[1] Dikenal juo sabagai Suku Daya dan marupokan satu dari limo suku tarasiang nan tingga di Kabupaten Donggala[2] Komunitas masyarakaik Suku Lauje indak hanyo tingga di Kabupaten Donggala sajo. Ado nan manatok di Kabupaten Toli-toli (Kecamatan Dondo), Kabupaten Parigi Moutog (Kecamatan Palasa,[3] Tinombo, Tomini, Ampibabo),[4] Kabupaten Poso sarato ado juo nan mauni kawasan Kabupaten Banggai (Kecamatan Luwuk).[1]
Asa-Usua
[suntiang | suntiang sumber]Suku iko masih ciek rumpun jo Suku Tialo. Kaduo suku tasabuik marupokan bagian dari Suku Tomini.[2] Bahaso Suku Lauje tamasuak kadalam Rumpun Bahaso Austronesia, kalompok Bahaso Malayu-Polinesia Barat.[4] Komunitas Suku Lauje mayakini bahwo nenek moyang inyo banamo Yongko Umur nan kamudian malahiakan duo katurunan banamo Olongian Laki-laki, atau disabuik juo Llah Ta’ala, dan Olongian Padusi, atau disabuik sabagai Nur Llah. Llah Ta’ala tingga di “Alam Ateh” (Langik), sadangkan Nur Llah tingga di “Alam Bawah” (Bawah Tanah). Kaduonyo dipicayo sabagai nenek moyang langsuang Suku Lauje.
Sistem Kapicayoan
[suntiang | suntiang sumber]Sabagian masyarakaik Suku Lauje alah manganuik Agamo Kristen, salabiahnyo adolah Muslim.[1] Panelitian tarakhia nan dilakukan Mahasiswa Fakultas Ilmu Budaya Universitas Hasanudin pado tahun 2009 manunjuakkan bahwo suku Lauje nan mandiami pasisia Taluak Tomini hinggo kaki Gunuang Sojol jumlah panduduaknyo mancapai 3.971 jiwa atau 737 KK, Dari jumlah itu sabanyak 3.176 jiwa baragamo Islam, sadangkan sisonyo baragamo Kristen.[5]
Meski alah manganuik Agama Samawi, sistem kapicayoan dari nenek moyang masih inyo hormati jo partahankan, tamasuak soal asa-usua inyo. Urang Lauje masih mampicayoi bahwo ado babarapo Ilah (dewa) nan mangatua kahidupan manusia di dunia. Inyo adolah Rajo Tongka Alah (tingga di langik), Puang Ma Petu (tingga di bawah tanah) jo Olongian (tingga di mato aia). Rajo Tongka Alah marupokan parantaro roh-roh urang mati jo urang hiduik. Sadangkan Lalu Puang Ma Petu dikenal sabagai Ilah Parusak, sadangkan Olongian diyakini sabagai Ilah Panyalamaik.
Inyo mampicayoi juo kabaradoan roh-roh gaib nan dipicayo pulo mampunyoi tugaih di dunia urang hiduik jo manoloang kahidupan urang-urang Lauje. Ado Togu Petu, Togu Ompongan jo Togu Ogo. Togu Petu batugaih manjago tanah. Jadi barhasil atau indaknyo manusia bacocok tanam ditantukan oleh roh tasabuik. Lalu Togu Ompongan dipicayo sabagai panguaso hutan balantaro nan mangawasi tingkah laku manusia di utan. Salanjuiknyo Togu Ogo batugaih sabagai panguaso sungai sakaliguih panjago aia. Kapado roh-roh tadi suku Lauje biasonyo maminta restu sabalum malakukan aktivitas-aktivitas tatantu di sakitar tampek tingganyo.[1]
Mato Pancaharian
[suntiang | suntiang sumber]Mato pancaharian hiduik urang Lauje adolah baladang. Nan inyo tanam utamonyo padi jo jaguang. Inyo juo mananam sayua-mayua, cangkeh, bawang putiah, ubi parancih, ubi jala, pisang, kaliki jo manggo. Sabagai sambilan, pekerjaan inyo adolah mancari rotan, damar, kemiri, mambuek karajinan tangan, baburu juo bataranak. Katiko maso paceklik tibo, Urang Lauje sanggup batahan hiduik hanyo dengan mangkonsumsi ubi jala “unggayu”, atau gadung “ondot” nan tumbuah lia di utan-utan.[1]
Urang Lauje nan bamukim di Kabupaten Parigi Moutong buliah mampunyoi pandapekan rato-rato sampai Rp.10 juta pabulan dari mamanen coklat jo cangkeh, tantu sajo katiko harago kaduonyo sadang tinggi. Untuak dikatahui kabupaten iko marupokan pamasok coklat tagadang di Indonesia.[6]
Mulonyo urang Lauje (khususnyo di Parigi Moutong) manggunokan konsep baladang indak manatok. Namun sajak era 1980-an pola saperti itu palahan-lahan barubah. Inyo mulai mangenal tanaman jangko manangah jo panjang, saperti cangkeh, kakao jo karambia. Urang Lauje mampicayoi mimpi. Jikok sabalum mananam jaguang jo padi sacaro basamoan lalu inyo bamimpi malihek bintang, inyo yakin isi mimpi itu patando baguih buat mereka: ladang akan aman dari gangguan hamo jo hasilnyo akan malimpah.[3]
Sistem Adaik
[suntiang | suntiang sumber]Sistem Kakarabaikan
[suntiang | suntiang sumber]Urang Lauje mangenal juo sistem kalompok kakarabaikan lueh. Inyo hiduik bakalompok. Ciek kalompok, atau babarapo kaluargo inti, tingga di rumah nan samo. Meskipun demikian, satiok kaluargo inti mampunyoi dapuanyo masiang-masiang. Saperti kabanyakan suku di Indonesia, Urang Lauje manganuik sistem patrilineal. Sistem parkawinan inyo tamasuak dalam sistem eksogami kalompok. Anak-anak inyo buliah mamiliah jodoah inyo surang, bahkan manikah dengan pasangan di lua kalompoknyo. Namun jikok indak mandapekkan parsatujuan dari urang tuonyo, inyo buliah mamiliah mekanisme adaik lainnyo: kawin lari.[1]
Lembaga Adaik
[suntiang | suntiang sumber]Lembaga adaik urang Lauje dinamokan Yelelumut. Institusi adaik iko ado untuak mangatua bagaimano masyarakaik batindak jo baparilaku sasuai aturan adaik istiadaik nan diajarkan turun-tamurun dari nenek moyang inyo. Lembaga iko masih dihormati oleh urang-urang Lauje. Contoh nyata dalam pangelolaan utan. Campua tangan Yelemut masih dibutuahkan agar indak tajadi panyimpangan nan buliah sajo barujuang konflik antaro warganyo.
Lembaga adaik iko buliah juo maagiahkan sanksi adaik bagi para pelanggar aturan adaik. Pelanggar akan diadili sacaro adaik di balai adaik. Pangadilan adaik iko basipek kakaluargoan. Sanksi nan diagiahkan pun disasuaikan dengan gadang keteknyo kasalahan, kamampuan ekonomi jo usia si pelanggar. Contoh soal pohon beringin (nunu). Pohon iko bagi urang Lauje adolah pohon karamaik dan warganyo dilarang kareh untuak manabangnyo, meskipun pohon tasabuik tumbuah atau barado di tanah punyo pribadi. Palanggaran untuak manabang pohon baringin akan diagiahkan sanksi barupo dando pitih jo piriang tuo (salamate).[3]
Tradisi Moganoi
[suntiang | suntiang sumber]Komunitas urang Lauje takenal hiduik dari alam, oleh karano itu inyo sangaik manghormati alam. Raso cinto inyo tahadok alam salah satunyo buliah diliek dari Tradisi Moganoi nan masih balangsuang, saperti misalnyo di Desa Bamba Siang, Kecamatan Palasa. Moganoi marupokan tradisi maagiahkan sasajen dalam rangko maminta restu kapado panguaso gaib nan dipicayo hiduik jo manguasoi lingkuangan tasabuik. Biasonyo dilakukan sabalum sasaurang mambuka utan. Didampiangi olongian (pamimpin adaik) warga nan nio mambuka lahan di utan talabiah dahulu mampasiapkan isi sasajen.
Sasajen haruih barupo buah pinang (mandulang), kapur (tilong), daun siriah tambako (taba’o), pitih logam (do’i mo’oat). Satalah siap, lalu sasajen haruih dilatakkan di ateh kain putiah, ditata sadamikan rupo sahinggo taliek rapi. Salanjuiknyo ditinggakan sajo salamo duo malam. Satalah didiamkan, urang nan nio mambuka utan haruih mamarikso kambali sasajen itu. Jikok indak rapi lagi bararti tando bahwo nan basangkutan indak dipabuliahkan mambuka lahan di kawasan nan diinginkannyo. Namun jikok sabaliaknyo, tatok rapi, mako urang tasabuik buliah mambuka utan (manabang pohon) untuak ditanami.[3]
Pandidiakan
[suntiang | suntiang sumber]Karano masih banyak nan mamakai konsep hiduik bapindah-pindah dan tingga di tampek tapancia, atau di tangah utan, urang-urang Lauje (saindaknyo nan tingga di Parigi Moutoung) kabanyakan hanyo marasokan pandidiakan sampai tingkek sikola dasa sajo. Salain bapindah-pindah, faktor pamahaman urang tuo tahadok pandidiakan turuik juo manantukan. Pamahamannyo, jikok basikola tujuannyo adolah mancari pitih, labiah elok anak-anak inyo bakarajo kini manoloang inyo mananam coklat jo cangkeh. Pamahaman iko juo nan akhianyo mambuek anak-anak urang Lauje banti basikola di tangah jalan.[6]
Rujuakan
[suntiang | suntiang sumber]
- ↑ a b c d e f Melalatoa, DR. M. Junus (1995). Ensiklopedi Suku Bangsa di Indonesia: Jilid L – Z.. Jakarta: Departemen Pendidikan dan Kebudayaan..
- ↑ a b Suwondo, Bambang (1984). Sejarah Daerah Sulawesi Tengah. Jakarta: Departemen Pendidikan dan Kebudayaan Proyek Inventarisasi dan Dokumentasi Kebudayaan Daerah.
- ↑ a b c d Rosita; Rachman, Imran; Alam, Andi Sahri (2017). "Kearifan Masyarakat Lokal Suku Lauje Dalam Pengelolaan Hutan di Desa Bambasiang Kecamatan Palasa Kabupaten Parigi Moutong". WARTA RIMBA. Volume 5, Nomor 1. ISSN 2579-6267. Diarsipkan dari versi asli tanggal 2022-09-15. Diakses tanggal 18 Maret 2019.
- ↑ a b Hidayah, Dr. Zulyani (2015). Ensiklopedi Suku Bangsa di Indonesia. Jakarta: Yayasan Pustaka Obor Indonesia, Anggota IKAPI DKI Jakarta. ISBN 978-979-461-929-2.
- ↑ "Mahasiswa FIB-UH Buat Buku Suku Lauje". kompas online. 05 Maret 2009. Diakses tanggal 14 Maret 2019.
- ↑ a b Jemabut, Inno (23 October 2018). "Suku Lauje, Penabung Uang di Atas Pohon". sinarharapan. Diarsipkan dari versi asli tanggal 2019-07-12. Diakses tanggal 13 Maret 2018.