Cabo Udra
| ||||
| Tipo | península Zona de especial conservación espazo natural protexido Zonas de especial protección dos valores naturais  | |||
|---|---|---|---|---|
| Localización | ||||
| División administrativa | Bueu, España e Cangas, España | |||
| ||||
| Características | ||||
| Superficie | 626,57137 ha | |||
| World Database on Protected Areas | ||||
| Identificador | 349140 | |||
| Área protexida da rede Natura 2000 | ||||
| Identificador | ES1140009 | |||
| Historia | ||||
| Data de creación ou fundación | decembro de 2004 | |||
Cabo Udra é un cabo e un espazo natural galego catalogado como zona especial de conservación (ZEC) que inclúe a costa leste da ría de Aldán, e que está na ría de Pontevedra. O cabo Udra é o cabo de que limita a ría de Aldán coa de Pontevedra e ademais o que limita o espazo natural protexido polo norte. A punta do Niño do Corvo está ao sur deste cabo e pecha o espazo natural. A área de conservación, que maioritariamente é mariña, ocupa 623,03 ha. do concellos de Bueu e de Cangas, ambos na comarca do Morrazo. Cangas conta cunha reducida proporción do espazo protexido.[1][2][3][4][5]
Xeografía
[editar | editar a fonte]O cabo Udra atópase en Beluso, Bueu, na parte exterior da ría de Pontevedra, e limita xunto coa punta do Couso a ría de Aldán. Desde o cabo Udra pódese observar a costa norte da ría (lugares como a punta de Cabicastro en dirección norte) e a punta Couso, cara ao suroeste, e que pecha a ría de Aldán. As illas Ons obsérvanse desde o cabo mirando cara ao oeste, xa que as illas se atopan no exterior da ría.
O espazo natural de cabo Udra está case na súa totalidade en Bueu. Comenza polo norte coa praia de Mourisca, en Beluso, Bueu, mirando ao esteiro de Beluso, e acolle ao cabo Udra e todo o seu litoral, como as enseadas de Centuleira, Barcelo e a cala do Ancoradoiro. Avanza cara ao interior da ría de Aldán chegando ata a punta do Niño do Corvo, en Aldán, Cangas. Nesta sección están as enseadas de Pouso e a de Cano da Cunca. A praia de Pedrón, de Encoradoira, de Lago, de Area de Bon, do Reventón e a de Laguelas están dentro do espazo natural. Do mesmo xeito, hai varios regos menores, que case nacen e chegan á costa dentro del. O rego Nosendo ten un percorrido algo maior pero tamén nace xa preto da costa.
O litoral da costa do espazo protexido é de morfoloxía suave e o solo está formado por rochas graníticas (granitoides biotíticos e outras rochas básicas similares).[6]
Fauna e flora
[editar | editar a fonte]Flora
[editar | editar a fonte]Este litoral destaca por ser unha zona de rochedo exposta ao mar e con cantís cubertos con queirogais. A maior extensión é a do sublitoral: bancos de areas cubertos continuamente e calas e baías pouco fondas. Alí están presentes os arrecifes. En terra, os queirogais son tanto os propios de zonas atlánticas temperás, que se compoñen de Erica ciliaris e Erica tetralix, como algúns propios de zonas secas europeas. Nos rochedos dominan as especies pioneiras e especies casmofíticas. Nalgúns puntos están presentes praderías de gramíneas e formacións de Nardus. Ten zonas con augas estancadas e turbeiras. En menor extensión, hai presenza de bosques de ribeira con abeneiros (Alnus glutinosa) e freixos (Fraxinus excelsior).
Fauna
[editar | editar a fonte]Da fauna deste espazo destacan Euphydryas aurinia, un lepidóptero, e os mamíferos mariños toniñas (Phocoena phocoena) e arroaces (Tursiops truncatus). Ademais, alberga a 14 aves de interese de conservación.[4]
As especies de fauna catalogadas como especies silvestres en réxime de protección especial ou presentes no catalogo galego de especies ameazadas son:[4]
| Grupo | Especie |
|---|---|
| Invertebrados | Coenagrion mercuriale |
| Invertebrados | Lucanus cervus |
| Peixes | Chondrostoma polylepis |
| Anfíbios | Discoglossus galganoi |
| Mamíferos | Lutra lutra |
| Mamíferos | Myotis myotis |
| Mamíferos | Rhinolophus ferrumequinum |
| Mamíferos | Rhinolophus hipposideros |
Patrimonio
[editar | editar a fonte]No cabo Udra atópase o castro de Udra, un castro da idade de bronce.
Na praia de Ancoradouro e na de Mourisca hai fábricas de salgadura. Ademais, en Chan de Esqueiro hai refuxios dos últimos dous séculos e que empregaban os pastores, os chouzos, para resgardarse.[7]
No cabo está a "Batería J-2", un batería militar do século XX agora abandonada.[7]
Lexislación
[editar | editar a fonte]O Cabo Udra foi declarado como lugar de importancia comunitaria (LIC) en decembro de 2004 e ascendeu a zona especial de conservación (ZEC) en marzo de 2014.[4]
Galería de imaxes
[editar | editar a fonte] |
Commons ten máis contidos multimedia sobre: Cabo Udra |
-
Praia do Ancoradoiro. -
As illas Ons vistas desde Cabo Udra. -
Batería J-2.
.jpg)
Notas
[editar | editar a fonte]- ↑ BOE - Goberno de España, eds. (29/12/2004). "Decisión de la Comisión, de 7 de diciembre de 2004, por la que se aprueba, de conformidad con la Directiva 92/43/CEE del Consejo, la lista de lugares de importancia comunitaria de la región biogeográfica atlántica [notificada con el número C(2004) 4032].". Diario Oficial de la Unión Europea: L 387/1–96.
- ↑ Consellería de medio ambiente (Luns, 31 de marzo de 2014). DOG - Xunta de Galicia, eds. "DECRETO 37/2014, do 27 de marzo, polo que se declaran zonas especiais de conservación os lugares de importancia comunitaria de Galicia e se aproba o Plan director da Rede Natura 2000 de Galicia." (62): 13.427.
- ↑ Consellería de medio ambiente (Luns, 12 de abril de 2004). DOG - Xunta de Galicia, eds. "DECRETO 72/2004, do 2 de abril, polo que se declaran determinados Espazos como Zonas de Especial Protección dos Valores Naturais." (69): 5.046.
- ↑ 4,0 4,1 4,2 4,3 Consellaría de Medio Ambiente e Ordenación do Territorio, Xunta de Galicia (eds.). "ZEC ES1140009 Cabo Udra". Consultado o 10/9/2019.
- ↑ Axencia Ambiental Europea - Unión Europea (eds.). "NATURA 2000 - ES1140009 Cabo Udra". Consultado o 10/9/2019.
- ↑ Instituto Geológico y Minero Español - IGME (eds.). "Visor InfoIGME". Arquivado dende o orixinal o 31/12/2019. Consultado o 10/9/2019.
- ↑ 7,0 7,1 Concello de Bueu (eds.). "Turismo: Cabo Udra". Consultado o 10/9/2019.
