Cabinda (provinsie)

Nie-amptelike vlag van Cabinda, wat deur separatiste gebruik word

Ligging van Cabinda in Angola

Amptelike Logo van Cabinda

██ Republiek van die Kongo██ Demokratiese Republiek van die Kongo██ Cabinda (Portugees-Kongo)██ Angola

Cabinda (ook Kabinda, die voormalige Portugees-Kongo) is 'n eksklawe en provinsie van Angola. Dit grens in die noorde aan die Republiek van die Kongo en in die suide aan die Demokratiese Republiek van die Kongo. Die hoofstad en grootste stad is Cabinda. Die provinsie het in 2007 sowat 300 000 inwoners gehad met 'n oppervlakte van 7 270 km².

Tussen 1885 en 1975 was Cabinda 'n deel van die Portugese Ryk. Oorspronklik was Cabinda as 'n onafhanklike land beplan, maar Angola beset Cabinda en sedert 1975 is Cabinda 'n deel van Angola en die Bakongo strewe na onafhanklikheid.

Geskiedenis

Cabinda (ook bekend as die Portugese Kongo) word sedert 1 Februarie 1885 as 'n Portugese protektoraat erken deur die Koloniale Konferensie van Berlyn. Na die Angelierrevolusie in Portugal het verskeie politici belangstelling getoon om Cabinda deel van Angola te maak, hoewel dit nie daaraan grens nie. Dit het inderdaad met die onafhanklikheid van Angola in 1975 gebeur. Kort daarna het die Frente para a Libertação do Enclave de Cabinda (FLEC, Front vir die Bevryding van die Enklawe Cabinda) 'n oorlog teen die Angolese teenwoordigheid begin, wat tot vandag toe voortduur.

Daar is baie berigte oor menseregteskendings in Cabinda. In 2003 het 'n ad hoc-kommissie van die UNHCR berig dat die MPLA baie gruweldade gepleeg het. In 2004 het die direkteur van die Human Rights Watch-missie vir Afrika berig dat die Angolese leër voortgegaan het om misdade teen Cabindese burgerlikes te pleeg.

In Julie 2006, ná die wapenstilstandonderhandelinge in die Republiek van die Kongo, het António Bento Bembe - as president van Cabindan Forum for Dialogue and Peace, en vise-president en uitvoerende sekretaris van FLEC - aangekondig dat die separatiste van Cabinda gereed is om 'n wapenstilstand te verklaar. Bembe was die leier van die "Cabindan Forum for Dialogue", 'n organisasie wat die meeste Cabinda-groepe verteenwoordig. Die vrede is erken deur die Verenigde State, Frankryk, Portugal, Rusland, Gaboen, die Demokratiese Republiek van die Kongo, die Republiek van die Kongo, Japan, Suid-Korea, die Europese Unie en die Afrika-unie.

"Ons gaan 'n skietstilstand onderteken met die Angolese wat in ruil daarvoor die beginsel aanvaar het om spesiale status aan Cabinda te verleen," het hy aangekondig en gesê dat sy groep beplan om deel te wees van Angola, met 'n belofte van een of ander vorm van outonomie.

Vanaf Parys het FLEC-FAC aangevoer Bembe het geen gesag of mandaat om met die Angolese te onderhandel nie, en dat die enigste aanvaarbare oplossing die totale onafhanklikheid is.

Ekonomie

Aan die kus lê olievelde wat van die grootste ter wêreld is. In 1954 is daar met navorsing begin en produksie vind sedert 1968 plaas. Cabinda produseer 700 000 vate petroleum per dag, wat ongeveer 70% van die Angolese olieproduksie uitmaak. Dit maak dus 80% van die uitvoer van Angola uit en is baie belangrik vir die Angolese BNP. Cabinda Oil is verbonde aan Sonangol, Agip Angola Lda. Sonangol besit 41%, Chevron 39,2%, Elf 10% en Agip 9,8%.

Eksterne skakels

• Amptelike webwerf van die provinsiale goewerneur Geargiveer 25 Junie 2015 op Wayback Machine
• Informasie oor die provinsie van die Angolese regering
• Informasie oor die provinsie by Info Angola
• Amptelike "Republiek van Cabinda" webwerf
• Amptelike Webwerf van die Republiek van Cabinda in Ballingskap F.L.E.C (Engels)
• VSA regering statistiek van 1988
• Uitbuiting van mense van Cabinda beweer
• Provinsie geografiese informasie by geoview.info