蜻蜓

How to read a taxobox 蜻蜓
藍晏蜓（Aeshna cyanea）
物種分類
界 動物界 Animalia 門 節肢動物門 Arthropoda 綱 昆蟲綱 Insecta 目 蜻蛉目 Odonata 亞目 (Subordo): Epiprocta Infraorder: 差翅下目 Anisoptera Selys，1854

蜻蜓（粵音：cing1 ting4），廣東話舊時叫塘尾mei1，係指屬於蜻蛉目差翅下目（學名 Anisoptera）嘅昆蟲，有大約 3,000 種物種。佢哋外形上好易認：一隻蜻蜓會有兩隻好大嘅複眼，兩對強而有力又透明嘅翼同埋修長嘅腹部，腹部通常粗壯過佢哋嘅近親豆娘。

蜻蜓喺生態上好重要：喺昆蟲界，蜻蜓係一種好惡嘅捕食者，會獵食任何細隻過佢哋嘅昆蟲；佢哋嘅成蟲能夠快速飛行，佢哋啲獵物－包括烏蠅、蚊、蝴蝶、飛蛾同蜜蜂呀噉－往往飛得唔夠蜻蜓咁快，會畀蜻蜓喺空中捉住同食落肚；而且蜻蜓嘅若蟲係要喺水裏面生活嘅，所以蜻蜓成蟲乸成日都會喺濕地同池塘等潮濕（兼且多害蟲聚集同滋生）嘅地方活動想搵地方生蛋，而啲乸會喺呢啲地方聚集，啲公就自然都會想去呢啲地方搵乸交配。因為噉，蜻蜓會食走大量嘅害蟲，廣泛噉畀人類覺得係益蟲。

蜻蜓嘅形象响人類嘅文化當中時不時出現。响廿世紀打前嘅歐洲同美國，蜻蜓好多時畀人當正係凶邪之物咁滯，例如美國南部就曾經有民間迷信話蜻蜓會幫蛇（一種成日畀人覺得邪惡嘅動物）捉昆蟲，而且仲會醫治受咗傷嘅蛇，係蛇嘅手下。事實係响英文裏面，蜻蜓嘅名係 dragonfly－當中 dragon 係指傳統上描繪成邪惡嘅西方龍。

形態

睇埋：蜻蛉目同豆娘

蜻蜓嘅成蟲係大隻、強壯嘅飛蟲，對複眼大到霸佔咗個頭嘅大半橛，令佢哋有強勁嘅視覺（更加方便佢哋喺空中捉蝴蝶同花蜂等嘅獵物）。佢哋全部物種嘅成蟲都識飛，無論飛緊定落咗地唞緊嗰陣都會將啲翼打橫噉攤開嗮－唔似得佢哋近親豆娘（Zygoptera）噉唞嗰時興將啲翼收埋。

2005 年影到嘅一隻蝦黃赤蜻（Sympetrum flaveolum）；一隻典型嘅蜻蜓唔飛嗰陣興攤開對翼。 2005 年影到嘅一隻蝦黃赤蜻（Sympetrum flaveolum）；一隻典型嘅蜻蜓唔飛嗰陣興攤開對翼。  2007 年影到一隻青紋細蟌（Ischnura senegalensis）；一隻典型嘅豆娘唔飛嗰陣興合埋對翼。 2007 年影到一隻青紋細蟌（Ischnura senegalensis）；一隻典型嘅豆娘唔飛嗰陣興合埋對翼。

一隻蜻蜓嘅成蟲身體身體表面有一節節嘅外骨骼（節肢動物嘅特徵），成蟲嘅身體分做頭、胸同腹三橛（昆蟲嘅特徵），通常粗壯過豆娘。蜻蜓個頭好易認：佢哋啲觸鬚以昆蟲嚟講好短，不過眼就好大，個頭大半嘅面積都由兩隻巨大嘅複眼覆蓋住，兩隻複眼會喺頭頂嗰度相會；蜻蜓嘅複眼由數唔嗮咁多隻細眼（ommatidia）組成，而「一隻複眼有幾多隻細眼」呢點就會隨物種而有異－澳洲嘅東南蜻蜓（Petalura gigantea）一隻複眼據講有 23,890 隻細眼，而且隻隻一樣咁大；除咗兩隻大複眼之外，一隻蜻蜓嘅頭仲會有三隻向前嘅簡眼（ocelli）；眼下面仲有口器，蜻蜓嘅口同口器強而有力，能夠咬碎佢哋捉住嘅細隻昆蟲。

下圖係典型嘅蜻蜓嘅身體結構圖：

生命週期

睇埋：唔完全變態

蜻蜓係行唔完全變態嘅，即係話佢哋唔經蛹嘅階段就變成成蟲：例如蝴蝶同飛蛾等嘅鱗翅目昆蟲係行完全變態嘅，佢哋啱啱出世嗰陣係條毛蟲，毛蟲一條條噉，個樣同成蟲（一隻鱗翅目成蟲有兩對佈滿鱗嘅翼）好唔同；呢啲毛蟲生到咁上下會結蛹，身體喺蛹入面溶化重組變成成蟲；好似蜻蜓呢啲行唔完全變態嘅昆蟲就唔同，唔會結蛹，由蛋度生出嚟嘅幼體叫若蟲（nymph / nim1），除咗冇翼之外，若蟲望落同成蟲冇乜大分別，若蟲會慢慢生，大到咁上下啲翼就會撐開令隻蟲有能力飛變成成蟲，隻成蟲跟住就會飛去搵伴侶。

蜻蜓生命週期嘅起始點係蛋：交配完大咗肚嘅蜻蜓乸會搵地方生蛋，生蛋地點同蛋嘅形狀就種種物種都唔同；將蛋生喺植物入面嘅蜻蜓物種嘅蛋多數係好似米噉形嘅，而其他蜻蜓蛋亦有呈波噉形；一竇蜻蜓蛋可以有成 1,500 粒蛋咁多，通常會喺 1 至 3 個星期內孵化變成若蟲。

一隻蜻蜓大半世都係喺水入面渡過嘅－視乎物種，蜻蜓嘅若蟲期可以有成 4 至 5 年咁長。

2009 年响法國影到嘅一隻帝王蜻蜓（Anax imperator）若蟲 2009 年响法國影到嘅一隻帝王蜻蜓（Anax imperator）若蟲  2010 年响愛爾蘭影到嘅一幅相；一隻帝王蜻蜓乸喺度生蛋。 2010 年响愛爾蘭影到嘅一幅相；一隻帝王蜻蜓乸喺度生蛋。

2006 年有人影到一隻物種不明嘅蜻蜓若蟲喺度蛻皮變成蟲，啲翼仲未伸出嚟。

當一隻典型嘅蜻蜓若蟲準備好要變成蟲嗰陣，佢會暫時唔食嘢住，趁夜晚黑游上水面：隻若蟲首先要喺水面等一陣－蜻蜓若蟲同成蟲其中一樣大分別係，若蟲係靠生喺直腸度嘅鰓嚟唞氣嘅，但成蟲就要齋靠唞空氣嚟生存；所以隻若蟲嘅身體要喺水面度做少少變化先，令隻若蟲變成能夠齋靠唞空氣嚟生存嘅狀態；呢個過程搞掂之後，隻若蟲就會爬上水生植物度做蛻皮，做蛻皮嗰時隻蟲塊外骨骼要喺頭後面嗰個脆弱位裂開，裂到咁上下隻成蟲就會由外骨骼度捐出嚟，塊淨低嘅皮會開始硬化，同時隻蟲要向上伸展，開始唞空氣，令佢嘅血淋巴大舉流入佢啲翼度，啲翼跟住就會伸展，隻成蟲就準備好要飛去做佢一世蟲最後嘅目標－傳宗接代。

隻蟲變成蟲之後，通常未能夠即刻搵伴侶：啱啱變咗成蟲嘅蜻蜓通常冇乜顏色，要等 1 個禮拜（呢個數會視乎物種而有異）左右，隻蟲先至會有嗮成蟲嘅樣；啲完全成熟咗嘅蜻蜓會飛去水體左近度搵伴侶交配；部份物種啲公會周圍霸地盤，並且會嘗試同接近佢哋地盤嘅乸交配。成蟲通常冇幾耐命－蜻蜓成蟲條命好多時得嗰 2 至 3 個禮拜咁長，有啲物種嘅成蟲可以有 6 至 8 個禮拜咁耐命；短命啲嘅物種，可能甚至成個生命週期得嗰 6 個月咁長而啲成蟲得嗰幾日命。

交配

蜻蜓嘅交配同繁殖過程出嗮名獨特。

首先，隻蜻蜓公要以某啲方式（好多時係霸地盤）打低其他蜻蜓公，爭到一隻蜻蜓乸嘅芳心。當一對蜻蜓公乸準備想交配嗰陣，隻公要將啲精子由生喺腹部最尾段嘅性器傳去佢腹部底嘅第二性器度，跟住佢就要用條尾嗰度嘅 clasper（睇返上面嘅蜻蜓身體結構圖）捉住隻乸嘅頭部，同時隻乸會將自己嘅腹部扭曲，由隻公嘅第二性器度接收精子。順帶一提，一對交配緊嘅蜻蜓公乸，成日畀人話佢哋兩隻望落好似形成咗一個「心形」噉。

交配過後，隻公通常會陪住隻乸去搵地方生蛋，而且係一路陪一路維持住交合嘅形態。噉樣據講係因為性選擇嘅壓力：原則上，就算交配嘅過程搞掂咗，隻公都唔包保一定可以生產到下一代－第隻蜻蜓公有可能會搵嗰隻乸交配，將隻乸先前接受咗嘅精子「挖走」，再注入自己嘅精子，所以對一隻交配咗嘅蜻蜓公嚟講，佢有必要防止呢樣嘢發生；除此之外，「兩隻一齊飛去搵地方生蛋」呢點亦都被指幫到隻蜻蜓乸慳力－橫掂啲蜻蜓公乸生蛋過程完咗之後都冇幾耐命，所以隻公可以索性將自己一世蟲最後嘅氣力攞嚟幫隻乸搵地方安全噉生蛋，反而更有利於佢啲後代生存繁衍。

無論公定乸，蜻蜓通常交配生完蛋後冇幾耐就會死。跟住佢哋啲下一代就會重複上述呢個由生到死嘅過程。

一對交配緊嘅蜻蜓公乸； 上面嗰隻係公下面嗰隻係乸。 一對交配緊嘅蜻蜓公乸； 上面嗰隻係公下面嗰隻係乸。  又一對交配緊嘅蜻蜓公乸 又一對交配緊嘅蜻蜓公乸  飛住噉嚟交配 飛住噉嚟交配

生態研究

一隻毛蜻蜓（Brachytron pratense）搵到嘢食－佢擔住隻花蜂。

蜻蜓係昆蟲界出名嘅大型食肉猛獸，無論喺若蟲定成蟲階段佢哋都係捕食者。蜻蜓若蟲會住喺淡水（例如池塘）入面，捕食細隻過佢哋嘅無脊椎動物，而大隻啲嘅蜻蜓物種嘅若蟲仲有可能會捉蝌蚪或者細隻啲嘅魚嚟食；蜻蜓成蟲有敏銳嘅視覺而且飛行能力好勁，會喺空中捕食細隻過佢哋嘅昆蟲，好似係蝴蝶、蜜蜂同蟬呀噉。

棲息地

睇埋：濕地

喺棲息地上，蜻蜓普遍偏好濕地等潮濕嘅環境：蜻蜓若蟲通常係住喺淡水水體裏面嘅，所以啲蜻蜓乸鍾意去呢啲地方生蛋，而既然啲乸會去呢啲地方生蛋，啲公就自然興响水體左近搵地盤霸；而且呢啲地方成日惹到各種細昆蟲聚集－即係話比較多獵物畀蜻蜓捉。

不過對於「邊種水體最有利於若蟲生存」，唔同嘅物種嘅需求可能有啲唔同，

• 流動：有啲物種嘅蜻蜓比較偏好流動嘅水體，所以會鍾意河多過池塘，而亦有物種係偏好靜止唔郁嘅水，所以鍾意池塘多過河。
• 暫時水體：有部份物種嘅蜻蜓有特殊結構，能夠抵禦乾旱，興喺啲暫時性質嘅水體度生蛋－「暫時性質嘅水體」指（例如）比較大嘅水氹，呢啲水氹維持唔得耐，過若干時間之後會蒸發消失，但勝在冇乜捕食者存在，啲若蟲可以安心發育。
• 水生植物：「啲水體多唔多植物」都係一個重要考慮因素，包括毛蜻蜓（Brachytron pratense）在內嘅多種蜻蜓物種都鍾意植物茂密嘅水體，貪啲若蟲有得匿埋喺植物裏面避開捕食者；而且有啲蜻蜓物種係定死咗，一定要將蛋生喺某啲水生植物上面嘅。
• 化學特性：「水體嘅化學特性」包括咗啲水有幾多養份或者 pH 呀噉，酸得滯（有研究指係 pH < 3 ）嘅水不利於若蟲發育，不過亦有部份嘅物種零舍鍾意酸性高嘅水，例子可睇吓黑赤蜻（Sympetrum danae）同小斑蜻（Libellula quadrimaculata）呀噉。

驚乜

睇埋：水鳥

蜻蜓喺昆蟲界係大型食肉獸，通常都係得佢哋食第啲昆蟲，冇話第啲昆蟲食佢哋。喺咁多昆蟲物種當中，得大隻啲嘅螳螂物種有能力捕食蜻蜓，不過就算係大隻嘅螳螂，佢哋捉蜻蜓嗰時仲係有頗高嘅失敗率；除咗螳螂之外，寄生蜂有陣時都會侵襲蜻蜓，喺蜻蜓身上生蛋，畀啲幼蟲食蜻蜓維生。

不過考慮埋昆蟲以外嘅動物嘅話，蜻蜓喺食物鏈入面嘅位置就唔算好高。一般嚟講，蜻蜓最大嘅天敵係雀鳥：雀鳥好多時都係雜食動物，會捉任何細隻過佢哋嘅動物嚟食－包括蜻蜓在內嘅各種昆蟲，都係雀鳥嘅獵物，好似燕子、雨燕同鶲在內嘅好多種雀鳥都畀人紀錄到佢哋能夠喺空中追捕蜻蜓同捉蜻蜓嚟食，而鴨同鷺等嘅水鳥，仲畀人紀錄到佢哋捕食水入面嘅蜻蜓若蟲。除咗雀鳥之外，第啲「捉得到嘅昆蟲都會照食」嘅動物－好似係蜘蛛同青蛙呀噉，都會捕食蜻蜓。

一隻雀仔擔住隻蜻蜓。 一隻雀仔擔住隻蜻蜓。  呢個竇入面最左邊嗰隻雀仔食緊隻蜻蜓。 呢個竇入面最左邊嗰隻雀仔食緊隻蜻蜓。  一隻黃蜻（Pantala flavescens）畀隻蜘蛛捉住咗。 一隻黃蜻（Pantala flavescens）畀隻蜘蛛捉住咗。

相集

• 
  澳洲成日見到嘅藍撇蜻（Orthetrum caledonicum）
• 
  一隻綠達拿（Anax junius）捕食蜜蜂
• 
  兩隻蜻蜓响度交配。
• 
  一隻蜻蜓响度生蛋。
• 
  一隻物種不明嘅蜻蜓若蟲
• 
  2006 年影到嘅一隻蜻蜓頭部近睇；
  典型嘅蜻蜓對複眼好大。
• 
  啱啱由若蟲殼度蛻出嚟嘅藍晏蜓
• 
  十二點撇蜻（Libellula pulchella）
• 
  八丁蜻蜓（Nannophya pygmaea）
• 
  公嘅藍寶石蜻蜓（Rhyothemis princeps）
• 
  公嘅金輪蜻蜓（Cordulegaster boltonii）
• 
  公嘅紫紅蜻蜓（Trithemis aurora）

著名日本畫家喜多川歌麿畫嘅花、蜻蜓同蝴蝶，1788 年 （睇埋花鳥畫嘅概念） 著名日本畫家喜多川歌麿畫嘅花、蜻蜓同蝴蝶，1788 年 （睇埋花鳥畫嘅概念）

睇埋

• 烏蠅、蚊、蝴蝶同飛蛾：都係蜻蜓成蟲鍾意捕食嘅獵物
• 螳螂：昆蟲界另一種出名嘅大型食肉猛獸
• 香港昆蟲（香港蜻蜓）
• 風水
• 惡龍

文獻

英文文獻：

• Berger, Cynthia (2004). Dragonflies. Stackpole Books. p. 2. ISBN 978-0-8117-2971-0.
• Corbet, Phillip S. (1999). Dragonflies: Behavior and Ecology of Odonata. Ithaca, NY: Cornell University Press. pp. 559–561. ISBN 978-0-8014-2592-9.
• Dijkstra, Klaas-Douwe B. (2006). Field Guide to the Dragonflies of Britain and Europe. British Wildlife Publishing. ISBN 978-0-9531399-4-1.
• Meister, Cari (2001). Dragonflies. ABDO. p. 16. ISBN 978-1-57765-461-2.
• Powell, Dan (1999). A Guide to the Dragonflies of Great Britain. Arlequin Press. ISBN 978-1-900-15901-2.

拎

• （英文） 蜻蜓，不列顛百科全書