Khip-chio̍h

Khip-chio̍h (吸石) sī ē sán-seng chû-tiûⁿ ê châi-liāu ia̍h bu̍t-thé. Chit-ê chû-tiûⁿ khoàⁿ-bē-tio̍h, m̄-koh kiông-chû-sèng ê bu̍t-chit, chhin-chhiūⁿ thih, ē kám-siū tio̍h khip-chio̍h ê la̍t teh kā in giú ia̍h-sī sak.

Éng-kiú khip-chio̍h (permanent magnet) sī ē-tàng ka-kī sán-seng éng-kiú chû-tiûⁿ ê chû-sèng-hòa bu̍t-thé. Ē-tàng pī chû-sèng-hòa ê châi-liāu, in goân-pún chiū í-keng sī kiông-chû-sèng. Kiông-chû-sèng châi-liāu pau-hâm thih, ni-ké-luh, cobalt, chi̍t-kóa hi-thó͘-lūi kim-sio̍k kap chi̍t-kóa thian-jiân khòng-bu̍t. Tî-liáu kiông-chû-sèng bu̍t-chit, kî-thaⁿ bu̍t-chit mā siū tio̍h chû-tiûⁿ ê éng-hióng, chí-sī hoán-èng khah bô hiah-nī-á kiông.