钱弘倧
吴越忠逊王钱弘倧（928年－971年），字隆道，五代个辰光吴越国君主。
生平
[编辑]钱弘倧是文穆王钱元瓘第七个倪子，忠献王钱弘佐个兄弟，孝献世子钱元僔同母兄弟。养出来个辰光，俚个爷做梦梦着一个人献黄金一箧，所以小名叫万金。 后汉天福十二年，钱弘佐死脱，俚个倪子年纪忒小，所以勒遗诏当中让兄弟钱弘倧继立。天福十二年六月丙寅，勒杭州吴越王宫天册堂即位。搿许辰光辽太宗耶律德光灭后晋，占据中原，钱弘倧向辽称臣；弗久辽军退去，再对后汉称臣。 之前忠献王钱弘佐在位个辰光，将军侪交关骄横，虽然擅权者侪畀杀脱，但不过对下属还是相当宽大个；而钱弘倧个性严厉坚定，等到继位后，要改变搿种情况，因此极力抑制将领。即位之后弗久就勒碧波亭检阅水军，内牙统军使胡进思进谏说颁赏忒厚，钱弘倧怒，拿笔丢勒水里。胡进思怕畀铲除，就先发制人。 后汉天福十二年（947年）十二月三十日（阳历是948年2月12日），钱弘倧勒王宫里夜宴诸将。胡进思怀疑王要杀脱自家，就带领内牙亲兵戎服入宫，发动政变。钱弘倧畀软禁勒义和院，胡进思迎钱弘倧个异母兄弟钱弘俶，拿俚策立为王。 钱弘俶即位后，拿钱弘倧迁到太祖故里衣锦乡。虽然胡进思弗久之后就病杀脱哉，但不过钱弘倧还是继续畀软禁。后周广顺元年（951年），钱弘俶拿钱弘倧迁到东府越州（今朝绍兴）帮俚兴筑宫室，拿东府官物供畀俚。勒西寝殿后头个卧龙山帮钱弘倧开辟花园，遍植花木。每年元夜勒山头浪张灯，用油几千斤，钱弘倧登山敲鼓，声达于外，官吏报告，钱弘俶也弗问。下来每年过节个辰光个赠礼侪非常丰厚。 宋太祖开宝年间，钱弘倧因病死脱，享年四十四岁，以王礼安葬，赠谥忠逊王（一作谥让王）。
倪子
[编辑]钱昆
钱易