Hofmeier

Hofmeier of majordomo, van ‘t Latyn maior domus (ipperstn van ‘t huus), was e titel in ‘t Frankisch Ryk in de 7ste en 8ste êeuwe. Den Hofmeier was verantwoordelik vo de menoage an ’t hof, lik e sôorte ipperknecht of butler.

In Austrasië, ’t nôordôostelik stik van ’t keunienkryk van de Frankn ounder de Meroviengers, evolueerde den titel van Hofmeier noar e functie woaby dan ze mêer en mêer te zeggn haan. Deurdan d’er verschillige zwakke en jounge keuniengn ip den trôon zaatn an ’t ende van de Meroviengische periode, paktn ze geleidelik an de macht over. De Meroviengische keuniengn van die periode krêegn de benoamienge van Vadsige keuniengn.

Uuteindelik haan de Pepinidn, e familie van Frankische edeln die diendn ols Hofmeier, ol de macht, en de functie kwam erfelik.

Pepeyn I, bygenoamd van Landn of den Oudstn, was de grôtvoader an moeders kant van Pepeyn II, bygenoamd van Herstal of de Middnstn. De bastoardzeune van Pepeyn II, Karel Martel, was ôok e belangrykn Hofmeier.

In 751 kwamt de zeune van Karel Martel, Pepeyn III, bygenoamd de Kortn, met de steun van paus Zacharias, keunienk van ‘t Frankisch Ryk. Je zette de latste Merovingische keunienk Childerik III of en stichtte de dynastie van de Karoliengers. Zyn zeune Karel de Grôotn, die in 800 gekrôond wierd tout keizer van ‘t West-Romeins Ryk en gereeknd wordt ols Karel I van ’t Karolingisch Hillig Rooms Ryk, krêeg nog mêer macht en kwam êen van de belangrykste figeurn van d'Europeesche geschiedenisse.