Dubn

Dubn
Дубна

Lidnanznam	Flag
Valdkund	Venäma
Eläjiden lugu (2024)	74,032 ristitud
Pind	63,36 km²
Pämez'	Maksim Tihomirov (semendku 2023—)
Telefonkod	+7−49 621-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Dubn (ven.: Дубна́) om Venäman tedolidn da lidnümbrik Moskvan agjan pohjoižes.

Istorii

Eländpunktan aluz om pandud 11. voz'sadan augotišes, mainitase vspäi 1134, oti 6 gektarad, mongoližed sodaväged paniba lidnad mantazole vl 1238. Dubnan muitpunkt oli olmas hätken sen sijas Suren Uz'lidnan tazovaldkundan i Pohjoižpäivnouzmaižen Venän röunal. Gorodišče-žilo oli olmas Dubnan jogensun randal.

Panihe peitol'žen Dubno-tedožilon alust vl 1947. Kätihe eländpunktad oficialižeks radnikžiloks vl 1954, anttihe lidnan statusad vl 1956, om olmas nügüdläiženke nimenke vspäi 1958. Ühtištadihe Ivan'kovo-lidnanke (alusenpandud vl 1937) vn 1960 13. päiväl tal'vkud. Om tedolidnan statusanke vspäi 2001.

Dubn šingotase ladimensauvomižen «Tenzor»-tegimel, mašinansauvomižen tegimel (aviakosmine sarak), kontrol'sistemiden projektiruindan edheotandal, südäitukuižen fizikan tedoidusil mail'man znamoičendanke i Ivan'kovon GES:al.

Geografijan andmused

Lidn sijadase Volg-jogen randoil, Dubn-jogen (ven.: Дубна 167 km pitte) lanktendanno oiktalpäi, 125 m ü.m.t. keskmäižel korktusel. Röunatab Tverin agjanke. Kanal Moskvan nimed zavodiše lidnas, mäneb Ivan'kovon vezivaradimespäi.

Matkad Moskvan rengazavtotehesai om 121 km suvhe. Lähembaižed lidnad oma Kimri (Tverin agj) pohjoižpäivnouzmha, Taldom päivnouzmha, Konakovo (Tverin agj) päivlaskmha-suvipäivlaskmha.

Tobmuz

Dubn om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeližed lidnan pämehed oma Sergei Kulikov (sügüz'ku 2020 — semendku 2023), Maksim Danilov (tal'vku 2017 — sügüz'ku 2020). Lidnan Deputatoiden nevondkundan ezimez' om Jevgenii Uglov vn 2023 redukuspäi. Edeline nevondkundan ezimez' om Andrei Tamonov (sügüz'ku 2020 — reduku 2023).

Eläjad

Vl 1959 lidnan ristitišt oli 14 009 eläjad, vl 1967 — 39 tuhad eläjid. Vn 2010 Venäman rahvahanlugemižen mödhe 70 700 ristitud elihe lidnas. Kaik 75 018 eläjad oli lidnas vl 2017. Kaikiš suremb lidnan ristitišt om enamba 70 tuhad eläjid vspäi 2010 (75 179 rist. vl 2016).

Rahvahad (2010): venälaižed — 94,7 %, ukrainalaižed — 1,7 %, toižed rahvahad — 3,6 %.

Rahvahad (enamba 0,4 % vl 2021): venälaižed — 85,7 %, tadžikalaižed — 0,8 %, ukrainalaižed — 0,7 %, uzbekad — 0,5 %, armenijalaižed — 0,4 %, toižed rahvahad — 3,5 %, rahvahuden ozutandata — 8,4 %.

Ortodoksižen hristanuskondan kahesa pühäpertid oma kaičenus i saudud lidnas: kuz' jumalanpertid i kaks' časounäd.

Lidn om järedaks openduzkeskuseks. Lapsiden opendusen aluzkundad oma 23 päivkodid, 15 keskškolad (niišpäi koume privatišt), čomamahtoiden škol, muzikškol, horan škol i kaks' studijad, vezisuksiden škol, sambon škol, lapsiden da norišton turizman i ekskursijoiden keskuz. Professionaližen opendusen aluzkundad oma Valdkundaline «Dubn»-universitet i kolledž senno (vll 2004−2011 erigoittud Moskvan agjan tegimištoliž-ekonomine kolledž), Moskvan üläopendusen aluzkundoiden koume filialad, Dmitrovan tehnikuman alajaguz (edel vn 2021 keväz'kud Moskvan agjan agrariž-tehnologine «Dubn»-tehnikum).

Galerei

• 
  Lidnümbrikon tobmuden pert' (2015)
• 
  Venäman Kaikiden Pühämehiden jumalanpert', vn 2015 nägu
• 
  Tedotegimištoline Atom-ühtelmaz vl 2015
• 
  «Dubn»-universitetan päkorpus (2015)
• 
  Lidnan Tedomehiden pert' (2019)
• 
  Sur' Volg-raudtestancii vl 2005
• 
  Dubn-raudtestancii vl 2015

Irdkosketused

• Lidnümbrikon tobmuden aluzkundoiden sait (naukograd-dubna.ru). (ven.)