Lost in Space (Film)

Filmdaten
Plattdüütsch Titel:	—
Originaltitel:	Lost in Space
Düütsch Titel:	Lost in Space
Produkschoonsland:	USA
Johr vun’t Rutkamen:	1998
Läng:	125 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	Stephen Hopkins
Dreihbook:	Akiva Goldsman
Produkschoon:	Carla Fry Akiva Goldsman Steven Hopkins Mark W. Koch
Musik:	Bruce Broughton
Kamera:	Peter Levy
Snitt:	Ray Lovejoy
Dorstellers
William Hurt: Prof. Robinson Mimi Rogers: Maureen Heather Graham: Judy Lacey Chabert: Penny Jack Johnson: Will Gary Oldman: Dr. Smith Matt LeBlanc: Major West Jared Harris: de öllere Will John Sharian: Noah Freeman Edward Fox: Gewarfsmann

Lost in Space (op Platt so veel as „Verschullen in’n Weltruum“) is en US-amerikaanschen Speelfilm vun 1998. De Science-Fiction-Film baseert op de gliek nöömte Feernsehreeg Lost in Space (hoochdüütsch: Verschollen zwischen fremden Welten) ut de laten 1960er Johren. Bit op twee hebbt all noch leven Schauspelers ut de ollen Reeg Nevenrullen in den Film speelt: Mark Goddard, de in’t Orignal Major West speelt hett, is as General to sehn; June Lockhart, de fröhere Mudder Maureen, kummt as de Schooldirektersche vun Will vör. Marta Kristen un Angelica Cartwright, de Original-Döchter vun de Robinson, harrn Rullen as Reporters.

Inholt

De Film speelt in dat Johr 2058. De Eer un de Minscheit staht kort vör’t Enn, vun wegen dat sik de Ozonschicht meist oplöst hett un de Rohstoffen to Neeg gaht. Ut denn Grund maakt sik de Wetenschoppler Professer Robinson mit sien Familie op’n Weg mit den Ruumschipp Jupiter II na den nächsten Planete, op den Minschen leven künnt: Alpha Prime. Dor schüllt se en Hypergate opboen un den Planet vör de Kolonisatschoon vörbereiten. Globale Separatisten wüllt aver dat Hypergate, dat bi de Eer al boet warrt, tweimaken, so dat de Start vun dat Ruumschipp vörtogen warrt. Major West, de sik bi den Angreep vun de Separatisten uttekent hett, warrt Pilot vun de Jupiter II, vun wegen dat sien Vörgänger ümbröcht worrn is.

An de Vörbereitungen vun den Flaag is ok Dr. Smith bedeeligt, de sik aver vun de Separatisten besteken leet un de Mission saboteert. He programmeert den Roboter an Boord so, dat he de Familie 16 Stünnen na’n Start dood maken schall. Man Smith warrt vun sien Opdraggevers över’t Ohr haut un blifft bewusstlos op dat Schipp torüch as dat lösflüggt. He warrt waak, jüst as de Roboter anfangt, den Plaan ümtosetten un dat Schipp tonichten to maken. As Smith nich alleen gegen den Roboter ankummt, blifft em blots een Weg, neemlich de Familie wedder ut jemehrn Küllslaap optowaken. Dat Schipp is aver al vun’n Kurs afkamen un stüert nipp un nau op de Sünn to. De eenzige Utweg föhrt mit den Hyperandrief midden dör de Sünn dör. Ahn Hypergate aver kann een nich seggen, woneem dat Schipp wedder rutkummt, un so verlehrt se sikennerworrns in’t Weltall. Ahn dat to wullen un to weten fleegt se in de tokamen Tiet.

Se finnt en Ruumschipp mit den Naam Proteus in’n Ümloop üm en Planeten, dat ogenschienlich vun de Eer stamt. Se kiekt sik dor üm un warrt dorop vun Spinnen ut Silizium angrepen, wobi Smith besehrt warrt. De Spinnen sünd in de Övertall, un so künnt se de Gefohr blots so bikamen, dat se dat Schipp tonichten maakt: Major West sprengt den Andrief. Man, dör de Schockbülg stört de Jupiter II op den Planeten af. Unvermodens künnt se dor en Energieborn utmaken. Disse Energie bruukt se, dat se wedder vun den Planeten wegkamen künnt.

Aver de Energieborn liggt in en Blaas, de jümmer grötter warrt. De Professer un Major West gaht los un versökt sik in de Blaas ümtokieken. Man, dorbinnen deckt se alternative Tokumstvisionen vun Smith un Will op. De hebbt en Tietmaschien konstrueert, de Energie vun de Jupiter II aftütt un dormit versorgt warrt. Will hett vör, dormit wedder torüch in de verleden Tiet to reisen. Dor will he sien Familie dorvun afbringen lostoflegen un so dat eerste mol in’n Weltruum verloren to gahn. Dorbi warrt se aver all tohopen vun’n tokamen Dr. Smith bedragen, de in de Twüschentiet dör de Sehr vun de Spinnen sülvst to en Minsch-Spinnen-Hybriden muteert is. He hett nu sien egen Plaan un will ok torüch na de Eer, üm se mit sien Spinnen to övernehmen. Robinson un de tokamen Will versöökt Smith dorvun aftohollen, wiel Major West sik mit den jungen Will un den Original-Smith torüch na’t Schipp dörsleiht. De Professer besehrt den muteerten Smith, worop hen he vun sien egen Spinnen-Nakamen opfreten warrt. Smith fallt dorophen in den Tietstroom, de em aver ümbringt, vun wegen dat de Dörgang vör em to lütt is.

Bi de Flucht warrt de Planet opletzt dör de Tietblaas in Stücken reten un dat Schipp wiel den Flaag in’n Orbit vun en Felsbrocken drapen un tonichten maakt. De tokamen Will schickt aver sien Vadder dör dat Tietportal dör torüch op dat Schipp, kort vör den Start. Dor kann he West den Befehl geven, dör den Karn vun’n Planeten to flegen, as de uteneenbrickt. So warrt se dör de Gravitatschoon in’t Weltall sleudert. As se torüch in’t Weltall sünd bruukt se nochmol wedder den Hyperandrief. Ditmol hebbt se en Teel, vun wegen dat se op de Proteus ümfangrieke Steernkoorten funnen hebbt.

Dat Enn vun den Film is apen laten worrn, üm de Mööglichkeit för en wieteren Deel to hebben. Dorto is dat aver nich kamen, as de Spood vun dissen Film nich so dull utfallen is.

Kritiken

• Lexikon vun’n internatschonalen Film: Nach dem Vorbild einer 60er-Jahre-Fernsehserie entstandener Film, der eindrucksvolle Schauplätze und zahlreiche Spezialeffekte präsentiert, inhaltlich aber nicht mehr zu bieten hat als eine konfuse Mixtur diverser Science-Fiction-Motive. Zudem bleiben die Charaktere blass, so dass die Familie niemals als organische Einheit überzeugt und vielmehr überkommene soziale Strukturen offenbart.

• TV Spielfilm: Auch die 750 Spezialeffekte, Bösewicht Gary Oldman und Oscar-Preisträger William Hurt können diese Weltraumreise nicht davor bewahren, nirgendwo anzukommen

Utteken

De Film weer för tosamen twölf Filmpriesen vörslahn, ünner annern ok för den Razzie Award. Wunnen hett de Film blots een vun de Priesen, neemlich:

• 1999: den ASCAP Award in de Kategorie Top Box Office Films för Bruce Broughton

Medien

De Film is in Düütschland op DVD publizeert worrn, weer aver ok as VHS-Videocassett to köpen. De Original-Soundtrack is op CD rutkamen un bargt ok de Single Lost in Space vun de britischen Grupp Apollo 440.

Bi’n Heyne-Verlag sünd op hoochdüütsch de Filmromanen Lost in Space – Planet aus Stahl (Die neuen Abenteuer der Familie Robinson) vun Pat Cadigan un Lost in Space vun Joan D. Vinge na dat Original-Dreihbook vun Akiva Goldsman as Taschenböker rutkamen.

1998 is bi Dark Horse Comics en dreedeelige Comic-Adapschoon rutkamen. De Tekners weern Sordon Purell un Terry Pallot. De Verlag hett vun de dree Comics ok en Hardcover-Version op’n Markt bröcht.

Weblenken

• Lost in Space in de Internet Movie Database (engelsch)
• Kritik to Lost in Space op Rotten Tomatoes
• Sammelte Kritiken to Lost in Space op metacritics.com