Fahl
En Fahl (ok Fahlen oder Füllen) is dat Junge van en Peerd un warrt so nöömt, wenn dat noch nich öller is as een Johr. Bi annere Deerten van dat Geslecht Peer (as Zebras un Esels) warrt de Jungen ok Fahlen nöömt.
En Seken un en Heken seht meist gliek ut. De Verschelen kamt later, wenn de Deerten öller warrt. Dat Geslecht van en Fahl kann een liekers faststellen. Dor mutt een ünner de Steert kieken. De Geslechtsdeelen för en Seken sünd alreeds to sehen.
Nah en Dracht van üm un bi ölven Maanden warrt en Fahl tomeist nachts born. Wenn dat Fahl jüst boren is, wüll dat noch nich lopen. Man binnen een oder mehr Stünnen versöcht dat vun sülvst uptostahn. Vunwegen sien Benen to wiet uteneen staht, wankt dat up sien Poten. Dat Fahl geiht, wenn dat sien eerste Stappen in de Welt sett, direktermang na dat Jüdder van de Tööt. De eerste Melk warrt ok Beestmelk nöömt un bargt veel Stoffen, de dat Fahl good bruken kann.