Apia

Apia
Catedral catolica de Apia.
Pais	Samoa
Rejion	Tuamasaga
Area	123.81 km²
Popla	36,735 ab. (2011)
Densia	710 abitores/km²

Apia es la capital de Samoa. De 1900 a 1919, lo ia es la capital de Samoa Deutx. La site es locada a la costa norde sentral de Upolu, la isola du de Samoa. Lo es la sola "site" de Samoa e parteni a la distrito (itūmālō) de Tuamasaga.

La rejion urban de Apia ave un 36 735 abitores (seguente la conta de 2006) e es jeneral nomida la "Site de Apia". La fronteras jeografial de la area urban de Apia es xef la vileta Letogo e la rejion nova industrida nomida Vaitele.

Istoria

Apia ia es orijinal un vileta peti (con 304 abitores en 1800, de cual la capital de la pais ia prende sua nom. La vileta Apia esiste ancora en la capital moderna plu grande, cual ia crese per deveni un rejion urban estendosa con multe viletas. Como cada otra loca abitada en la pais, la vileta Apia ave sua propre xefes (matai) e jenealojia e salutas costumal (fa'alupega).

La capital moderna Apia ia es fundida en la desenio de 1850 e es la capital ofisial de Samoa de pos 1959.

La porto ia es la loca de un crise marinal malfamosa, a 15 marto 1889, en cual sete barcones de Deutxland, la SUA e Britan ia refusa sorti de la porto cuando un siclon ia es clar prosiminte, per evita ce la prima ci ta move ta perde sua onora. Tota la barcones ia afonda, estra la cruser brites Calliope, cual ia susede apena sorti de la porto a un milia per ora e ia survive la tempesta. Cuasi 200 persones esuan e deutx ia mori, e ses barcones ia afonda o ia es danada en modo nonreparable.

Samoa ueste ia es renada par Deutxland como Samoa Deutx de 1900 a 1914, con Apia como capital.

En agosto 1914, la Ocupa de Samoa Deutx par un forte misional de Zeland Nova ia comensa. Zeland Nova ia governa alora la isolas como la Teritorio Fidusial de Samoa Deutx de 1920 asta autonomi en 1962.

Cuando la pais ia luta per autonomi en la temprana de la sentenio 20, organizada par la promove Mau nasional, la stradas de Apia ia deveni la sentro de protestas nonviolente do multe samoanes ia es arestada. En lo cual ia deveni nomida "la saturdi negra", un asembla pasosa de Mau en la vila ia provoca la mata de la xef suprema Tupua Tamasese Lealofi 3 par polisiores de Zeland Nova a 28 desembre 1929.