Rosa Luxemburg
Rosa Luxemburg o Róża Luksemburg, má konosida por el su nombre espanyolisado Rosa Luksemburgo (Zamość, Polonia -5 de Marso de 1870 ó 1871– Berlin, Almania -15 de Jenero de 1919) fue una teorika marksista djudia de orijen polako, filosofa, politika i rebolusionaria.
Eya partisipo aktivamente en el Partido Sosialdemokrata de Almania (SPD), asta ke enel anyo 1914 se opuso radikalmente a la partisipasion de los sosialdemokratas en la Primera Gerra Mondiala, por konsiderar ke era una "gerra entre imperialistas". Paso a formar parte del grupo internasional ke enel anyo 1916 se konvirtio en Liga Espartakista, grupo marksista rebolusionario ke iva ser el orijen del Partido Komunista de Almania (KPD). Al akabar la gerra fundo el jurnal La Bandeira Kolorada, djunto kon Karl Liebknecht. Los sus livros má konosidos, publikados en espanyol, son Reforma i Revolusion (1900); Uelga de masas, partido y sindikato (1906); La Akumulasion del Kapital (1913) i La revolusion rusa (1918), en el ke la kritika duramente.
Endemas partisipo en la frustrada revolusion del anyo 1919 en Berlin, anke este alsamento tuvo lugar en kontro de los sus konseshos. La revuelta fue sofokada kon la intervension del armada emperial i la aktuasion de los Korpos Livres (o Freikorps, grupos de mersenarios nasionalistas de dirita), i al su akabe syentos de personas, entre eyas Rosa Luxemburg, fueron apresadas, torturadas i amortadas.
Tanto Rosa Luxemburg komo Karl Liebknecht tienen un gran valor simbolika en el marksismo mundial. Oy endia, kada anyo, un domingo a mediados de Jenero se selebra en Berlin, kon la partisipasion de al menos syen mil personas, el dia de Rosa Luxemburg i Karl Liebknecht, en arrekodro del amortamiento de los dos dirijentes komunistas el 15 de Jenero de 1919.
Enlasos eksternos
[trocar | trocar el manadero]
- Rosa Luxemburgo: La Rosa Kolorada (en espanyol)
- Arkivo de Rosa Luxemburgo en marxists.org
- Arkivo de Rosa Luxemburgo en marxists.org (en inglez, pero má kompleto)
- Luxemburguismo (Demokrasia komunista (luxemburgista)) en espanyol)