Liem Tjong Hie

Liem Tjong Hie
Persona informo
Naskonomo	Liem Tjong Hie
Aliaj nomoj	Hie Kiguj, Rimba Djohar
Naskiĝo	15-a de januaro 1906 en Semarang, Javo
Morto	1991
Lingvoj	Esperanto
Loĝloko	Semarang, Javo
Nacieco	Indoneziano
Ŝtataneco	Indonezio
Okupo
Okupo	Universitata docento

LIEM Tjong Hie (naskiĝis la 15-an de januaro 1906 en Semarang, Javo, mortis en aprilo 1991) estis javana esperantisto kaj universitata docento ĉe Universitas 17 Agustus 1945 en Semarang.

Biografio

Kiel infano, Liem studis en nederlandaj lernejoj en Semarang. Li esperantistiĝis en 1919, kiam li havis nur dek tri jarojn.

Li havis dek ok jarojn, kiam li iĝis delegito de UEA en 1924. En tiu jaro, li ankaŭ tradukis kaj eldonis la unuan libron en Esperanto pri Javo, Javaj legendoj kaj fabloj. En 1925, li fondis la revuon Hinda Esperantisto kaj ekredaktis ĝin. Li ankaŭ fondis la eldonejon kaj kursejon Centraal Esperanto-Bureau & -Instituut. En 1927, Liem tradukis kaj eldonis libron de Multatuli, Historio de Saidjah kaj Adinda. En 1929, Liem fondis la asocion Unuiĝo de Geesperantistoj en Nederlanda Hindujo. En decembro 1929, la Unuiĝo havis nur dek unu membrojn. Li tradukis ankaŭ Fundamenton de Esperanto en la indonezian.

Li restis delegito de UEA ĝis 1989.

Verkoj

• Liem Tjong Hie, Javaj legendoj kaj fabloj (1924).
  • La unua libro en Esperanto pri Javo.
• Multatuli (Liem tradukis), Historio de Saidjah kaj Adinda (1927).
  • Skanaĵo legebla ĉi tie.
• E. Ĉefeĉ (Liem tradukis al la malaja), Ŝlosilo de Esperanto (1929).
  • Plilarĝita eldono en 1931, kiu estis ĝis 2015 la sola paperforma vortareto de la malaja.
• ESPERANTO EN ZIJN VERBREIDING. Eld. Esperanto Bureau en Instituut, Samarang, 1931.
• Liem Tjong Hie, Apa itoe Esperanto (1933).
  • "Kio estas tio, Esperanto?" Eldonata de Centraal Esperanto-Bureau & -Instituut (Ekstremorienta Esperanto-oficejo kaj -Instituto).
• Hie Kiguj (pseŭdonimo de Liem), La varma sudo kaj la frosta nordo (Ĉinio 1966).
• SELAJANG PANDANG BAHASA ESPERANTO. 1960.

Recenzoj

Pri ESPERANTO EN ZIJN VERBREIDING

	„ Propagandilo (kia Aims and Claims) en nederlanda lingvo. ” — La Brita Esperantisto - Numero 325, Majo (1932)

„ La broŝuro pritraktas Ia praktikajn progresojn, kiujn Esperanto faris en la diversaj fakoj de la homa vivo : Ligo de Nacioj, lernejoj, Ruĝa Kruco, Komerco kaj Industrio, Foiroj, turismo, telegrafo, radio, parolanta filmo, poŝto, scienco kaj tekniko, literaturo. — La citita materialo estas agrable prezentita kaj tre certe la apero de tiu libreto estas la signo de antaŭenpuŝo de nia movado en tiu malproksima regiono. Ni gratulas la kuraĝan propagandiston S-ron Liem Tjong Hie al kiu ni deziras fruktoriĉan rikolton ” — Belga Esperantisto - Numero 192, Januaro, 1932

---

Pri SELAJANG PANDANG BAHASA ESPERANTO

„ Vere ni ne povas recenzi ĉi tiun libreton alveninta de tiel malproksima lando ĉar ni ne konas la indonezian lingvon kaj ankaŭ ni ne trovis alian samideanon kapabla koni ĝin. Tamen, ni ne povas ne mencii tiun libreton ĉar ĝi enhavas grandan intereson por montri la disvastiĝon de Esperanto tra la mondo. La afrikaj kaj aziaj popoloj komencas soni inter la kultur-movadoj en la mondo kaj ili ne povas resti for de la Esperanto-movado. La ricevo de ĉi tiu libro konfirmas tiujn vortojn, kaj montras la universalecon de Esperanto. Ni deziras grandan sukceson al la nova indonezia lernolibro de Esperanto. ” — A, P. S. Boletín n129 (sep 1961)

Eksteraj ligiloj

• Esperanto en Indonezio: LIEM Tjong Hie Arkivigite je 2013-08-22 per Archive.today
• Libroj kaj aliaj dokumentoj de kaj pri Liem Tjong Hie en la Kolekto por Planlingvoj kaj Esperantomuzeo Arkivigite je 2007-12-21 per la retarkivo Wayback Machine