Kongresedzino
Kongresedzino aŭ kongresa edzino estas ŝerca esprimo por partnerino en Esperanto-aranĝo. Kontraŭe al veraj geedzoj aŭ vivkunuloj, kongresaj geedzoj estas kune nur en Esperanto-aranĝoj; poste ĉiu revenas al sia hejmloko.
La esprimo estas uzata sendepende de tio, ĉu temas pri amrilato aŭ nura amikeco. La karakterizaĵo de kongresaj geedzoj estas unuavice, ke ili aperas en Esperanto-aranĝo kiel paro kaj ŝatas esti kune. Tiaj paroj povas estiĝi spontane en esperanta renkontiĝo, sed ekzistas ankaŭ kongresaj geedzoj, kiuj regule interkonsentas pri komuna partopreno en esperantaj aranĝoj.
Kontraŭe al veraj geedzoj, kongresaj geedzoj ne ĝuas la kunulan rabaton, kiun ricevas aliĝintoj kun sama adreso ekzemple ĉe Universalaj Kongresoj. Sed ili ofte profitas el la pli favoraj prezoj por dulitaj ĉambroj kompare kun unulitaj. Kutime tamen plej gravas por kongresaj geedzoj la sento ne esti sola, sed havi akompananton, kun kiu oni povas dividi siajn impresojn, spertojn kaj sentojn.
En siaj hejmlokoj, iuj kongresedz(in)oj vivas solaj, dum aliaj havas konstantan vivkunulon aŭ veran edz(in)on. Povas esti, ke la vera edz(in)o ne estas esperantisto kaj do ne emas kunvojaĝi al esperanta aranĝo, sed povas esti ankaŭ, ke inter la veraj geedzoj la amo malpliiĝis, aŭ iu sentas malpli da harmonio ol tiu trovas en akompano de kongresa edz(in)o.
La proksimeco inter kongresaj geedzoj povas esti diversgrada. Iuj preferas nur promeni kaj babili kune, aliaj brakumas aŭ kisas unu la alian, sed ankaŭ seksumado povas ludi rolon. En Esperantujo, la kongresaj paroj kutime decidas pri tiu proksimeco surbaze de konsentkulturo.
La termino kongresedzino apenaŭ estas uzata en la junulara Esperanto-movado. Tio povus rilati al tio, ke gejunuloj pli ofte serĉas ankoraŭ konstantan partneron; ĉe ili do pli ofte alia ŝerca esprimo ludas rolon - la funkcio de Esperanto kiel edzperanto. Kontraŭe, pli aĝaj homoj ofte jam havas stabilan vivon, kiun la rilato al kongresedz(in)o ne renversu - ili deziras plu pasigi sian ĉiutagan vivon aŭ sola aŭ konstante kun sia hejma partnero. Depende de la ĵaluzemo de la hejma partnero, la rilato al kongresedz(in)o povas esti sekreta aŭ malferma.
Post forpaso de sia regula kongresedz(in)o, iuj esperantistoj plu partoprenas en esperantaj aranĝoj kiel kongresvidv(in)o.
La esprimo kongresa edzino aperas ekzemple en la kabaredo La Verda Banano de Georgo Handzlik kaj Saŝa Pilipoviĉ, laŭ kiu esperantistoj estas tiel toleremaj, ke en esperanta kongreso oni ne devas ekskursi kun kongresa edzino, sed povas ekskursi eĉ kun propra edzino.
Laŭ prelego de Ilona Koutny en Arkones 2018, Esperanto estas la sola lingvo, en kiu la vorto kongresedzino ekzistas.
La vira ekvivalento kongresedzo estas malpli uzata. Laŭ komuniko de la Esperanta Civito, la esprimo kongresedzino estas masklisma[1].
Eksteraj ligiloj
[redakti | redakti fonton]- Kabaredo de Georgo Handzlik kaj Saŝa Pilipoviĉ pri kongresa edzino (ekde minuto 5:33)