Vai al contenuto

Green Jellÿ

Da Wikipedia.

C'l artìcul chè 'l è scrit in Miranduléś Emiliàn


«
Well the big bad Wolf, well he huffed and he puffed, all that he could and low and behold the little piggy's house stood. "It's made out of concrete!" the little piggy shouted, the wolf just frowned, as he pouted so they called nine-eleven, like any piggy would. They sent out Rambo, just as fast, as they could. "Yo, Wolf-Face, I'm your worst nightmare, your ass is mine!". Well the wolf fell dead as you can plainly see, so thats to end the story for you and me, if you still give a listen, you just may hear a big wolf or little piggy say: "Little pig, little pig, let me in." "Not by the hair of my chinny, chin, chin, chin!"»
(EN)(Three Little Pigs, 1992)
«
Dònchina al luvòṅ catìṿ al s éra mis a supiàr tut quél ch'al psiva, dòp ès'r-as impinî ad fiâ, e ca'l là al ninèṅ davànti a la cà incóra sù. "L'è fata ad cimènt!" al sigàva 'l ninét a 'l lóv, incasâ négar mènt'r al nimàl al ciamàva al 113, cuma tut i majalèṅ sò para i arévan fat. Chi lōr, più śvélt ch'i psìvan, i gh'ìvan mandâ Rambo. "Vê, Grugn ad Lóv, mè a sòṅ al tò più brut arbgàt ch'a t psiva capitàr, a t fag al cûl!". Bòṅ, al lóv al casca śò mòrt, cum a s pōl védar in manéra ciàra, e qvésta chè l'è la fiṅ dla stòria par vuàtar e par mè, ma s'a butâ incóra n'urécia, a psarî sintìr incóra un luvòṅ e un ninèṅ dir: "Ninét, ninét, fà-'m vgnir dèntar." "Ma và fóra da 'l bali!"»
(MUD)
I Green Jellÿ da 'l viṿ in dal 2010


I Green Jellÿ (a ś lèś green jello) 'l è 'n grup hard rock americàṅ ch'al fà dla mùśica demensiàla par rìdar. I s èṅ furmâ intóran a 'l 1981 e i aṅ cambiâ nóm da Green Jellö par di prubléma legài cun al marc Jell-O dla Kraft (l'è na gelatìna vérda). In Itâglia e in dal mónd i s èṅ fat cgnósar par la canta Three Little Pigs ch'la tōś ispirasiòn da la fòla di tri ninèṅ.

Biugrafìa

I Green Jellÿ i nàsan, par vulér ad Bill Manspeaker e Joe Cannizzaro, cuma Green Jellö in dal 1981 a Kenmore in dal stat ad New York cuma 'n quartét ch'al fàva dal punk cun dla cretinìśia adòs. La sò idéa in tèsta l'éra quéla ad dvintàr la "banda pèś ch'a gh fus in dal mónd".

Quand i aṅ pò tacâ a sunàr davśèṅ a Buffalo, i fàv'n i bufòṅ in sal palc cun di putòć lè dintóran. I n éra briśa bòṅ gnanc ad sunàr, difàti Cannizzaro, ch'al sunàva in alóra al bas, al druàva di culōr difarènt par tgnir-'s in a mènt al linìi ad bas ch'al gh'iva da far.

Al putòć dna vaca cun òṅ di Green Jellÿ dèntar

Dòp soquànt an ad gavéta, in dal 1984 i rigìstran Let It Be (Lasa ch’a sia), un EP cun 8 braṅ dèntar, fra i quài a gh'è anc 'l in Green Theme Jellö Song e I’ve Got Poo-Poo On My Shoe (A gh'ò dla pò-pò in dla mè scarpa, in séguit la dventarà Misadventures of Shitman). La cupertìna l'è na tòlta in gir ad quéla ad Let it be di Beatles. Al disc al vèṅ fóra in sōli sincsènt còpi, par quéi dal pòst.

In séguit al grup al sarìs par lōr di persunàǵ nóṿ da far, Shitman (un móstar gigànt ambulànt fat ad mèrda ad furmintòṅ), Cowgod (al Dio vaca), Rock n'Roll Pumpkin (la suca Rock) e Satan's Ham (al parsùt ad Sàtana). I cuncèrt dal grup i dvèntan quèl ad spetaculàr, cun vint cumpunènt a la vòlta in sal palc a far i àśan!

In dal 1989 i Green Jellö i faṅ gnir fóra un secónd disc, Triple Live Möther Gööse at Budokan, rigistrâ al vōl in un garàǵ ma cun un sòṅ dimóndi definî. Insém a 'l disc i faṅ anc na VHS cun di vìddeo par tut i braṅ.

In cal mèntar al grup al taca a muciàr sù di muśicìsta: al baterìsta Danny Carey (in séguit al sunarà p'r i Tool), al basìsta Bill Tutton (King Dot), i chitarìsta Marc Levinthal (Pippi Rockstocking), Steven Shenar (Sven Seven), C.J. Buscaglia (Jesus Quisp) e Bernie Peaks (Bernie Vicious). Al grup al mét insém anc siē cantànt: Bill Manspeaker (Moronic Dictator, Shitman, Marshall "Duh" Staxxx), Joe Cannizzaro (Dunderhead), Keith Matherne (Keni Logginz), Gary Helsinger (Hotsy Menshot, Piñata Head), Greg Raynard (Reason Clean, Toucan Son of Sam) e Maynard James Keenan (Billy Bob), più dū dóni a i côr.

In dal 1991, al grup al s preśénta a l'etichéta Zoo Entertainment (figliàla dla BMG) faghénd inténdar 'd èsar la prima vìddeo-banda dal mónd e prumiténd ad cavàr-gh-la a far tut (mùśichi, vìddeo, gràfica, etc...) cun sōl 50.000 dòlar. A n éra minga véra ma, cun al cuntràt in maṅ, al grup al còmpra na caméra, soquànt materiàl, dal légn e dal luś, e i tàcan a dar-as da far girànd i vìddeo prumìs dal sò cansòṅ.

A la fiṅ dal 1992 la caséta Cereal Killer l'è na ròba fata e acsè la pōl èsar dada a i negòsi da véndar. Piàn piâṅ la caséta la 'l fà, specialmènt in dal gir underground, ma l'è pò mèrit dna ràddio ad Seattle, cla traśmét la canta Three Little Pigs par schèrs, ch'al grup al fà 'l bòt.

Al cantànt di Green Jellÿ in asiòṅ

Tut i la ciàman e la Zoo Entertainment l'è custréta a far gnir fóra 'l EP Green Jellö SUXX cun dèntar quàtar cansòṅ ad Cereal Killer. Tut i vōlan védar la cansòṅ di tri ninét a la TV via caṿ The Box. Quand pò a 'l inìsi dal 1993 anc MTV la traśmét al vìddeo in dla sò traśmisiòṅ Headbanger's Ball, al disc di cereài al pōl finalmènt gnir fóra cun tuti al canti dèntar: a sém in d'l Avril dal 1993 e Cereal Killer Soundtrack al s fà catàr in di negòsi.

Dèntar al disc, i pès più bèi i gh'èṅ tut da Obey the Cowgod (sunàda a la manéra di Motorhead) a Anarchy in the U.K. (na cover di Sex Pistols ma chè al cantànt al n vōl minga dvintàr 'n aràrchic ma Fred Flinstone!), da House me teenage rave a Trippin' on XTC (i pàran i Red Hot Chili Peppers), da Misadventures of Shitman a Rock-n-roll Pumpkin, e pò i sìngui Three little pigs e Electric Harley House (of love) (la sòna cuma un pès di Kiss). Cla canta chè la gh'à dâ dimóndi prubléma parchè dèntar a s cata un riff cumpàgn a quél 'd Enter Sandman di Metallica e chi lōr i gh'aṅ fat càuśa, dimustrànd 'd avér pòc sèns d'l umurìśum, diversamènt da Paul Stanley e Gene Simmons di Kiss ch'i aṅ fat na cumparsàda in dal vìddeo.

Cereal Killer Soundtrack album al dvènta disc 'd òr in di Stat Unî, Cànada e in dla Śelànda Nóva e ad plàtin in Austrâglia, vindénd da piò ad dū migliòṅ e mèś ad còpi in tut al mónd.

«
We live in a country, where there is no, there's no beef-by products, obey the cowgod! You, on your knees, You get on your knees, where's those two boneheads? Get on your knees, hands behind your heads and on your knees, you on your knees, you get on your knees, I said on your knees, get on your knees and pray to the cowgod. Eat my burger, for it is my flesh and drink my milk, for it is my blood.»
(EN)(Obey the cowgod, 1993)
«
A vivém in un paéś, in du a n gh'è minga, a n gh'è briśa di prudót ad manś, ubidìs a 'l Dio Vaca! Tè, in śnòć, mét-at in śnòć, in du èṅ-i chi dū minciòṅ? In śnòć, al maṅ da drē da la tèsta e in śnòć, tè stà in śnòć, mét-at in śnòć, a-j-ò dit in śnòć, mét-at in śnòć e préga al Dio Vaca. Magnâ al mè hamburger parchè 'l è la mè carna e bvî al mè lat parchè 'l è al mè sangṿ.»
(MUD)
Al chitarìsta di Green Jellÿ

Sèmpar in c'l an lè a vèṅ fóra un braṅ fat insém a 'l campiòṅ ad Wresling Hulk Hogan: I'm the Leader of the Gang (I Am). La cansòṅ la riva al 40śum pòst dla clasìfica di sìngui dal Régn Unî.

In dal 1994 i regìstran al quàrt àlbum 333, un disc misć cun di braṅ metal, grunge e dance. Par via ad prubléma cun la cà discugràfica e sénsa far dla prumusiòṅ, al lavōr al n vénd briśa. Gnanc al sìngul The bear song, mis anc dèntar a la culòna sunóra dal film Scemo e più scemo di fradèi Farrelly, al n gh la cava minga a 'ndàr in clasìfica. In dal disc a gh'è anc un braṅ dicicâ a 'l nemìg stòric ad 'l Óm ragn, Carnage (Carnage Rules).

In dal 1995 i Green Jellÿ i rigìstran dal materiàl nóṿ ma al rèsta lè parchè la cà discugràfica, par via dla fiàsc ad 333, la gh'iva di prubléma. Quatórd'ś an dòp però chi braṅ lè i saràṅ catâ sù incóra par dar vita a 'l àlbum Musick to Insult Your Intelligence By (Mùśica p'r insultàr la vòstra inteligìnsa) dal 2009.

In cal mèntar però i dànan na cover ad Born to Be Wild a la culóna sunóra dal film umònim.

In dal 1996 i èṅ stâ numinâ p'r un Grammy Awards p'r al mijór vìddeo muśicàl (333) ma 'l prèmi al 'l à vins Peter Gabriel cun al sò Secret World Live.

Anc se al grup al n s è mai divìś uficialmènt da la fiṅ di an Nuànta i cumpunènt i èṅ pò andâ da par lōr.

I s métan incóra insém in dal 2008 par dar vita a di cuncèrt in du i véndan, sōl là, i vìddeo-àlbum ad Cereal Killer e 333. A la fiṅ 'd Agóst dal 2009, la banda la fà savér da la sò paǵna ad Myspace ch'i arévan tacâ 'n àtar tor in Aṿtòṅ.

Al 25 ad Mars dal 2010 al grup al partìs p'r al Parental Advisory Tour insém a i Nashville Pussy e a i Psychostick, cun 'n ùltim cuncèrt tgnû a Phoenix (in dl'Ariśòna) al 30 ad Maǵ.

Discugrafìa

La cretinìśia dal grup. Da nutàr 'l óm c'n al téti in sla dèstra
Al cantànt in mudàndi al fà 'l gèst dl'umbrèla

Àlbum

  • 1989 - Triple Live Möther Gööse at Budokan
  • 1991 - Cereal Killer
  • 1993 - Cereal Killer Soundtrack
  • 1994 - 333
  • 2009 - Musick to Insult Your Intelligence By

EP

  • 1984 - Let It Be
  • 1993 - Green Jellö SUXX
  • 1993 - Three Little Pigs – The Remixes

Sìngui

  • 1992 - Three Little Pigs
  • 1993 - Anarchy in the U.K.
  • 1992 - Electric Harley House (Of Love)
  • 1993 - House Me Teenage Rave
  • 1994 - The Bear Song
  • 1994 - Slave Boy
  • 1995 - I'm the Leader of the Gang (I Am)

Culegamènt estéran

Estratto da "https://eml.wikipedia.org/w/index.php?title=Green_Jellÿ&oldid=157101"