Buku Nahum

Nahum ᯉᯂᯔᯮ᯲ 1

1:1 On ma lumbalumba tu Ninive. Buku pangungkapon ni si Nahum, halak Elkos. ᯀᯉᯬ᯲ ᯔ ᯞᯔᯮ᯲ᯅᯞᯔᯮ᯲ᯅ ᯖᯮ ᯉᯪᯉᯪᯇᯩ ᯅᯮᯄ᯦ᯮ ᯇᯝᯮᯰ᯦ᯄ᯦ᯇᯉᯬ᯲ ᯉᯪ ᯘᯪ ᯉᯂᯔᯮ᯲ ᯂᯞᯄ᯦᯲ ᯀᯞᯩ᯲ᯄ᯦ᯘᯬ᯲

1:2 Debata * parrimas jala parlulu do Jahowa, parlulu do tongon Jahowa, jala parrimas situtu, parlulu do Jahowa dompak angka alona, jala parsunisunian ibana dompak angka musuna.

1:3 Lambat do Jahowa tarrimas alai na gogo situtu, * sai na luluhononna do: Jahowa mardongan habahaba dohot halisungsung parhiteanna, jala ombun do orbuk ni patna.

1:4 Mangonai hata ibana tu laut gabe marsik, sude angka batang aek pe marsik dibahen; malos ia Basan dohot Karmel, malos dohot bunga ni Libanon.

1:5 Angka dolok * humutur maradophon ibana, jala angka dolokdolok malala, jala tano i humuntal maradophon bohina ro di portibi on dohot pangisina sudena.

1:6 Tung ise ma manahan jongjong maradophon piripirina? Tung ise ma tarbahen tindang mida parpiar ni rimasna? Marjimburjimbur do songon api murukna, jadi angka torban ma dolok batu maradophon ibana.

1:7 * Pardenggan basa do Jahowa, tau partanobatoan di ari hagogotan, jala * ditanda do angka na marhaposan tu ibana.

1:8 Alai marhitehite aek na sumar sun siap inganannasida dibahen ibana, jala haholomon mangalotongi angka musuna.

1:9 Tung aha ma ditahi rohamuna mangalo Jahowa? Sun siap nasida dibahen ibana. Ndang pola dua hali hehe hagogotan.

1:10 Ai hira angka na nirait ni suga, jala hira angka na mabuk di parmabuhannasida sudahononna nasida, songon durame tahe na pate hiang.

1:11 Sian ho do ruar jolma na martahi hajahaton mangalo Jahowa, jolma partahi na jat situtu.

1:12 Songon on do hata ni Jahowa: Nang pe rimpas nasida, jala songon i torop, laos songon i do siap nasida sabion jala laho salpu boti. Ia dung hupajimput ho, ndang be ulahanku pajepol ho.

1:13 On pe ponggolhononku ma nuaeng augana sian ho, jala rapuanku angka rantem.

1:14 Alai nunga martona Jahowa taringot tu ho: Ndang be tarbarita goarmu; siaphononku do sian bagas ni debatam ganaganaan na niuhir dohot na tinuang; ahu do mambahen tanomanmu, ai maneangku do ho jumpang.

Nahum 2

2:1 Ida ma, * di atas angka dolok pat ni siboan barita na uli, na maningtingkon: Hademakan! Pestahon angka pestami, ale Juda, garari ma angka bagabagam! Ai ndang be solaon ni * na so marniula ho, nunga tung sun siap ibana.

2:2 Nunga nangkok ibana na paserak ho. Jamoti ma partanobatoan i! Taropangi ma dalan! Hohos i ma gontingmu! Pangke ma nasa gogom.

2:3 Ai pasuangon ni Jahowa ma hatimbulon ni Jakkob, songon hatimbulon ni Israel, ai nunga dipupusi angka pamupusi nasida, jala disegai angka ranting ni hau anggurnasida.

2:4 Nunga marrara lombulombu ni angka ulubalangna, marpangkean na tinubar angka baoa sialo musu, marsillam songon api do angka sasabi ni huretana porang di ari parhontasanna, jala angka hujur disamarahon.

2:5 Dienjak do angka huretai di alaman, mardorom di angka onan, rupana songon huathuat, songon hilap parsiksaknasida.

2:6 Diingot roha ni rajai angka ulubalangna, hape martinggangan nasida di angka lapangnasida; humalaput nasida manahopi parikna, hape nunga sonson salosap.

2:7 Dipatalak nasida nian angka bahal ni angka batang aek, jadi malala ma bagas bolon ni rajai.

2:8 Alai nunga putus uhumi ingkon pasalangon ibana laho tu habuangan, jadi songon parturtu ni anduhur pangandung ni borunasida, angka ditompuhi be do andorana.

2:9 Alai anggo Ninive, songon ambar pardengkean sian na robi do i, hape maporus do nasida: So hamu, so hamu! Alai ndang adong na olo humusor nanggo sahalak.

2:10 Gomaki hamu ma perak, gomaki hamu ma sere! Ai ndang marlilit angka arta na arga situtu dohot sude angka ulaula hasudungan ni roha.

2:11 Siap situtu jala pansing dipupusi luhutna * pola malala ateate ni jolma, jala angka hitir ulu ni tot jala dibobok gonting ni saluhut isina jala * marlangan bohinasida saluhutna.

2:12 Didia do nuaeng liang ni angka singa, jala didia panjampalan ni angka singa panoro? Parmeammeaman ni singa tunggal dohot boruboru ro di anak ni singa, jala ndang adong na hum manonggoti.

2:13 Singa na manoro sisoroon singkop di angka anakna, jala na manansani di singa boruboru angkupna, jala digohi liangna dohot soroan, jala ingananna dohot na ginotilna.

2:14 Ida ma, ro ma ahu marlulu dompak ho, ninna Jahowa Zebaot, martimpul ma timus ni angka huretam tutungonku, jala suda panganon ni podang angka singami, jala siaphononku soroanmi sian tano on, asa unang be tarbege soara ni angka suruanmi.

Nahum 3

3:1 Marjea ma * huta sisopsop mudar, tung gok gabus do i dohot pandoboon, ndang mansadi adong nilaumna.

3:2 Nunga pola tarbege parlisik ni batahi dohot parlopuk ni galapang dohot hoda na marinjak, dohot hureta na maringkatingkat.

3:3 Tole jolma parsihundul marrongoman ro dohot podang na marjillamjillam dohot hujur na marsillam, dohot torop halak angka na mabugang dohot bangke margugungugun, tung na so habilangan do bangke angka na marragean, pola martinggangan nasida dibahen angka na matena sian nasida.

3:4 Binahen ni hinadeak ni angka parmainanon ni parompuan * sibabijalang na geduk, parutiutian na pande, naung manggadis torop angka bangso marhite sian parmainanonna dohot angka marga binahen ni ujarujaranna.

3:5 Ida ma, marlulu ma ahu dompak ho, ninna Jahowa Zebaot, * lingkuphononku ma sarungmi tu bohim, jala paidahononku ma parsaemaraonmu tu angka bangso dohot hailaonmu tu angka harajaon.

3:6 Jala reongkononku ma tu ho biasbias, palea ho, jala bahenonku ho sitotonduron.

3:7 Asa ganup na marnida ho maporus sian ho, jala dohononna do: Nunga tung siap Ninive, tung ise be mangandungi ibana? Sian dia na ma luluanku angka na mangapul ho?

3:8 Tung dumenggan ma ho huroha sian * No-Ammon, na maringanan martopihon batang aek Nil, aek humaliang ibana, na martanobato laut, laut i tahe parikna?

3:9 Tole Kus na gonting dohot Misir, na so habilangan, Put dohot Kub, angka na hinaram manolongi ho.

3:10 Nasida pe nunga tarboan tu habuangan, posoposona pe dirosahi do di suhisuhi ni nasa alaman, jala * marruji do nasida taringot tu angka na marmulia, jala sude angka na raja ditali do dohot rante.

3:11 Ho pe, * ingkon mabuk sogot gabe monjap, ho pe luluanmu do partanobatoan maradophon musu.

3:12 Saluhut angka partanobatoanmu tudoshon hau antajau do marparbue na gulokon, molo hinutur, gabe madekdek do angka i tu pamangan ni halak na manganhon.

3:13 Ida ma, * boruboru do bangsom di tongatongami; ingkon talak do angka harbangan ni tanom dapoton ni musum, api manganhon ransangransangmi.

3:14 Datdati ma tahui aek di ho tumagam tungkumtungkum, patang partanobatoanmu, luntahi ma gambo, jala dogili tano liat, patogu ma liang panutungan.

3:15 Sai na suda do ho panganon ni api disi, siaphonon ni podang ho, gagatonna ho, songon panggagat ni * sihapor. Padeak ma ho songon tamponok, padeak ma ho songon sihapor.

3:16 Tumorop hian angka partigatigam dibahen ho sian bintang, angka na di langit, marrongoman angka sihapor, laos habang muse.

3:17 Songon sihapor do angka jujunganmi, jala songon gulomitgulomit angka indukmi, angka na marasar di dorpi uju di ari ngali: Binsar mata ni ari muse, gabe di purpurhon nasida, jala ndang tanda be ingananna manang didia.

3:18 Nunga mondokondok angka parmahanmi, ale raja sian Assur; nunga modom be angka partogim. Nunga marserak bangsom di atas ni angka dolok, jala ndang adong na papunguhon.

3:19 Ndang hadaonan hamamagom, nunga targisik bugangmi. Nasa na umbege baritam martopap be do martillahon ho, ai ise na so dibolus hajahatonmu tongtong?