Les filanderes
| Les filanderes | |
|---|---|
| Las hilanderas o la fábula de Aracne o los afiladores | |
 | |
| Llocalización | |
| Situación | Muséu del Prado |
| Coleición | Muséu del Prado |
| Datos | |
| Autor | Diego Velázquez |
| Añu | sieglu XVII |
| Xéneru | arte de xéneru y pintura mitolóxica |
| Materiales | Llenzu y pintura al oleu |
| Altor | 220 cm |
| Anchor | 289 cm |
| Dueñu | Fernando VII d'España |
| Web oficial | |
 | |
La fábula d'Aracne, más conocíu como Les filanderes, ye un llenzu de Diego Velázquez, conserváu nel Muséu Nacional del Prado. Esta obra ye de los máximos esponentes de la pintura barroca española y ta considerada como unu de los grandes exemplos de la maestría de Velázquez. Temáticamente ye una de les sos obres más enigmátiques, pos tovía nun se conoz el verdaderu propósitu d'esta obra.
Según Javier Portús Pérez, conservador y xefe del Departamentu de Pintura Española (hasta 1700) del Muséu del Prado:
... Las hilanderas constituye uno de los cuadros en los que es más fácil identificar la personalidad estética del Museo del Prado, una institución cuyas coleiciones durante siglos han servido como escuela de diferentes artistas de muy variada procedencia, y a través de los cuales se puede describir una nítida llinia de continuidad estilística, al margen de fronteras nacionales. Es un cuadro en el que están presentes a la vez el veneciano Tiziano, el flamenco Rubens y el español Velázquez, es decir, tres de las columnas vertebrales de la coleición.
Historia
[editar | editar la fonte]Como unu de los representantes diplomáticos de la infanta Isabel Clara Eugenia nes negociaciones pa la firma d'un tratáu de paz ente España y los Países Baxos, Rubens foi llamáu a Madrid, onde permanecería dende agostu de 1628 hasta abril de 1629, pol rei Felipe IV pa informase sobre diches negociaciones.[1] Al compartir taller con él mientres la so estancia na corte, Veláquez conoció bien la obra de Rubens, consistente en, amás de realizar unes 40 obres orixinales por encargu del rei y l'infanta —ente elles el Retratu ecuestre de Felipe IV y, más llueu, El xuiciu de Paris—[1] copiar, o «traducir al so propiu estilu», delles de les fábules mitolóxiques que Tiziano pintó pa Felipe II, y que pertenecíen a la coleición real del Alcázar de Madrid.[2][2][2]
Esisten discrepancies al respective de cuándo Veláquez pintó'l cuadru. Mientres que dellos espertos considérenlu posterior a Les menines (1656), acordies col conservador del Muséu del Prado, Javier Portús Pérez, la mayoría considera que la obra ye anterior al segundu viaxe que realizó Velázquez a Italia, en 1649.[2]
Supónse que pintó'l cuadru pa escontra 1657, na so etapa de mayor rellumanza, pa un veceru particular, Pedro de Arce. Como pintor del rei, Velázquez nun solía atender encargos privaos, pero nesti casu fixo una esceición pos Arce yera monteru de Felipe IV, ello ye, entamaba les sos monteríes (xornaes de caza) y, poro, tenía ciertes influyencies na corte de Madrid. Nun inventariu de los bienes d'Arce, fechu en 1664, la obra apaez como Fábula d'Aracne.[2] Darréu perteneció al duque de Medinaceli, siendo treslladáu al Real Alcázar de Madrid a la so muerte en 1711.[2][2] Foi estropiáu na quema de la Nuechebona de 1734, quema que destruyó por completu al alcázar.[3] Dende l'alcázar, foi treslladáu al palaciu del Buen Retiro[2] y darréu cítase como parte de la coleición del Palaciu Real, citáu nos inventarios realizaos ellí en 1772 y 1794.[4][3] En 1819, l'añu de la so inauguración, treslládase'l cuadru, xunto con otres obres de les Coleiciones Reales de los Reales Sitios al Real Muséu de Pintures y Escultures, l'actual Muséu del Prado.[2]
Tema
[editar | editar la fonte]En primer planu vese una sala con cinco muyeres (filanderes) que preparen les llanes. La muyer a derecha que visti blusa blanca ye «una clara tresposición» d'una de les figures de la Bóveda de la Capiella Sistina.[2] Al fondu, detrás d'estes muyeres y nuna estancia qu'apaez más elevada, apaecen otros trés muyeres ricamente vistíes que paecen contemplar un tapiz que representa una escena mitolóxica.
A lo llargo de munchos años consideróse a estes Filanderes como un cuadru de xéneru nel que s'amosaba una xornada de trabayu nel taller de la fábrica de tapices de Santa Isabel de Madrid y qu'esti yera'l so únicu asuntu. Sicasí, por mor de la mesma entidá del cuadru y pola «ambigüedá» de significaos presente en dalgunos de los llenzos más significativos de Velázquez, delles persones, ente elles Ortega y Gasset o l'historiador del arte español, Diego Angulo Íñiguez, apuntaben a un simbolismu mitolóxicu.[2]
Güei almítese que'l cuadru trata una tema mitolóxica: La fábula d'Atenea y Aracne, nuna escena del mitu d'Aracne que se describe nel llibru sestu de Les metamorfosis d'Ovidio.[4]Una moza lidia, Aracne, texía tan bien que les xentes de la so ciudá empezaron a comentar que texía meyor que la diosa Atenea, inventora de la rueca. La escena del primer términu retrataría a la moza a la derecha, vuelta de llombu, trabayando afanosamente nel so tapiz. A la izquierda, la diosa Atenea asonsaña ser una vieya, con falses canes nes vidayes. Sabemos que se trata de la diosa porque, a pesar del so aspeutu avieyáu, Velázquez amuesa la so pierna, de tersura adolescente. [ensin referencies]
No fondero, represéntase'l desenllaz de la fábula. El tapiz iguáu por Aracne ta colgáu de la paré; la so tema constitúi una evidente ofiensa contra Palas Atenea, una y bones Aracne representó dellos de los engaños qu'utilizaba'l so padre, Zeus, pa consiguir favores sexuales de muyeres y dioses. Frente al tapiz, apréciense dos figures. Son la diosa, afatiada colos sos atributos (como'l cascu), y énte ella la humana rebalba, que visti un paxellu de plegaos clásicos. Tán asitiaes de tal manera que paecen formar parte del tapiz. Otres tres dames contemplen cómo la ofendida diosa, en señal de castigu, va tresformar a la nueva Aracne n'araña, condergada a texer eternamente.
Estilu
[editar | editar la fonte]Velázquez xebra la obra en planos, a la manera d'aquellos cuadros medievales que los sos grupos han de «lleese» nun orde determináu, como si fueren páxines d'un llibru. Consigue que la nuesa vista pase de la filandera allumada de la derecha, a la de la esquierda, pa saltar percima de la que s'agacha na clarixa hasta la escena del fondu. Ellí, una de les muyeres vuelve escontra l'espectador como si sorprendiera de la nuesa incursión na escena. Poner el mensaxe nun segundu planu ye un xuegu típicu del Barrocu.
Tocantes a los colores, Velázquez emplega una paleta casi monocroma, con capes de pintura fines y esleíes. Sobremanera nes sos últimes obres, utiliza una gran variedá de tonos ocres, tierres y óxidos, aplicaos d'una manera pocu común a la so dómina: bien esleíos y con pinceles d'estiles finos y llargues. El dominiu de Velázquez nel manexu de los pinceles ye sobeyosu, yá que ye capaz de definir lo que desea pintar con escasa materia y poques pincelaes, tresformando una mancha en figura, según la distancia del espectador. Usa una pincelada suelta, asemeyada a la de los impresionistes dos sieglos más tarde.[4]
Unu de los puntos más destacables de la téunica de Velázquez ye la perspeutiva aérea, consiguiendo un efeutu «atmosféricu» similar al de Les Menines: consigue crear la sensación de qu'ente les figures hai aire qu'aburuya les contornes y les difumina, llogra captar l'espaciu qu'arropa les figures.
La maña del arte de Velázquez destaca tamién nel dinamismu qu'imprime al cuadru, dando sensación de movimientu, sobremanera nel xiru de la rueda, que los sos radios nun algamamos a ver pola velocidá a la que ta xirando y tamién nel personaxe de la derecha, qu'enduviella la llana con tanta rapidez que paez que tien seis deos.
Hai un «arrepentimientu» visible na cabeza de la rapaza de perfil de la derecha.
.jpg)
Partes añadíes
[editar | editar la fonte]El llenzu sufrió un cambéu cuando pertenecía a les coleiciones reales: foi enancháu pelos sos cuatro costaos —más de 50 cm pela parte cimera y 37 cm pelos llaterales— polo cual diches partes (como una ventana circular a lo cimero) nun fueron pintaes por Velázquez.[4][2] Supúnxose que sufrió daños mientres la quema del Alcázar de Madrid de 1734, y qu'entós foi ampliáu y montáu sobre un bastidor nuevu. Na década de 1980 foi sometíu a una restauración bien aballadora, una y bones delles capes de pintura esprendíense. Nesta intervención decidió caltenese les partes añadíes, magar anguaño despíntense al públicu encaxando'l cuadru nuna doble paré.
.JPG)
Referencies
[editar | editar la fonte]Enllaces esternos
[editar | editar la fonte]
Wikimedia Commons acueye conteníu multimedia sobre Les Filanderes.- Ficha na Galería online del Muséu del Prado
- Les filanderesnel Artehistoria.
| Control d'autoridaes |
|
|---|
Datos: Q984058- Multimedia: Las Hilanderas