Saltar al conteníu

Deborah Kerr

05-11-2020 14:15
De Wikipedia
Deborah Kerr
Vida
Nacimientu Helensburgh, 30 de setiembre de 1921[1]
Nacionalidá Bandera del Reinu Xuníu Reinu Xuníu
Residencia Helensburgh
Botesdale (en) Traducir
Muerte Suffolk, 16 d'ochobre de 2007[2] (86 años)
Sepultura St Mary's Church, Redgrave (en) Traducir
Causa de la muerte Enfermedá de Parkinson
Familia
Padre Arthur Charles Kerr Trimmer
Madre Kathleen Rose Smale
Casada con Tony Bartley (1945 – 1959)[3]
Peter Viertel (1960 – 2007)[3]
Fíos/es 2
Estudios
Llingües falaes inglés[4]
Oficiu actriz de cine, actriz, baillarina de balé, actriz de teatru
Premios
Nominaciones
IMDb nm0000039
Cambiar los datos en Wikidata

Deborah Kerr /ˌdebrə ˈkɑr/ CBE (30 de setiembre de 1921 – 16 d'ochobre de 2007) foi una actriz británica, una de les cares más conocíes del cine de Hollywood nos años cincuenta.[6] Tamién ye unu de los mitos femeninos del séptimu arte.

Biografía y carrera

[editar | editar la fonte]

Deborah Jane Kerr-Trimmer nació en Helensburgh, una pequeña población escocesa, el 30 de setiembre de 1921.[7] El so padre yera un militar que sufría les consecuencies de les firíes causaes mientres la Primer Guerra Mundial.[8] Siendo una moza tímida, afayó na interpretación un mediu pa espresase. La so tía, que yera profesora d'actuación, consiguió-y dellos papeles n'obres teatrales mientres yera entá adolescente.[9][10]

Deborah Kerr en Quo Vadis

Mientres una d'estes interpretaciones Kerr foi afayada por un productor de cine británicu, que contratóla pa dos películes en 1941 (una d'elles el clásicu de Gabriel Pascal Mayor Barbara[11][12] xunto a Rex Harrison, sobre la obra teatral de George Bernard Shaw). Kerr tuvo ésitu y convirtióse rápido nuna incipiente estrella del cine británicu de la mano de la compañía cinematográfica Rank,[13] interviniendo en títulos del calibre de Hatter's castle (1942, Lance Comfort), adautación d'una novela d'A. J. Cronin,[13] en compañía de James Mason, Robert Newton o Emlyn Williams;[13] la célebre Coronel Blimp (1943, Michael Powell y Emeric Pressburger) xunto a Anton Walbrook,[13] considerada pola crítica como una de los diez meyores películes de la historia del cine británicu; Separación peligrosa (1945,[6][14] Alexander Korda) al llau de Robert Donat, I see a dark stranger (1946, Frank Launder) empareyada xunto al notable actor Trevor Howard; o Black Narcissus (1947, Michael Powell),[15] nun cast completáu por Jean Simmons, Flora Robson y Sabu.[15]

Poco dempués, la Metro-Goldwyn-Mayer contratóla y Kerr treslladóse a Hollywood onde empieza una esitosa etapa de imborrable alcordanza pa tolos amantes del bon cine.[11] Asina, por citar dellos títulos, destaquen If winter comes (1947,[15] Victor Saville), interesante drama onde Kerr formaba parte d'un cast que completen Walter Pidgeon, Angela Lansbury y Janet Leigh; The hucksters (1947, Jack Conway), thriller onde compartía protagonismu con Clark Gable, Adolphe Menjou y Ava Gardner; Edward, My Son (1949,[16] George Cukor) con Spencer Tracy; King Solomon's Mines (1950, Andrew Marton y Compton Bennett) compartiendo cartelu con Stewart Granger y Richard Carlson;[16] la célebre superproducción basada na novela de Henryk Sienkiewicz Quo Vadis? (1951, Mervyn LeRoy) xunto a Robert Taylor o la estupenda versión de The Prisoner of Zenda que Richard Thorpe rodada en 1952 de nuevu con Stewart Granger y con James Mason y Jane Greer.[17]

Kerr sintióse, sicasí, encaxellada en ciertu tipu de personaxes femeninos un pocu estereotipaos, polo qu'aceutó en 1953 trabayar pa la Columbia en From Here to Eternity, encarnando a un personaxe más llibre ya independiente —magar tar casada con un mandu del exércitu y formar un aveníu matrimoniu—, y con una escena pasional y, pa la dómina,[18] abondo erótica con Burt Lancaster, que raspió l'escándalu y cola que rompió la so imaxe d'heroína virxinal ya inocente.[19][20][21] La película tuvo gran ésitu pol so guión (basáu na novela de James Jones),[22] calidá artística y repartu (Frank Sinatra, Montgomery Clift, Donna Reed, Ernest Borgnine,...) y Kerr foi candidata al Óscar como meyor actriz principal.[23]

A partir d'entós, l'actriz empezó a demostrar el so enorme talentu pa papeles dramáticos ricos en matices y con suxerentes implicaciones emocionales y/o psicolóxiques, aplicando la solidez adquirida nes sos esperiencies teatrales como base d'un métodu que abrió pasu na so manera d'interpretar pal cine. Alternó toa mena de papeles en películes tan destacaes como Julius Caesar (1953, Joseph L. Mankiewicz) compartiendo cartelu con Marlon Brando, James Mason, Greer Garson o Louis Calhern; Vivir un gran amor (1954, Edward Dmytryk) al llau de Van Johnson[24] nuna hestoria sobre una novela autobiográfica de Graham Greene, versionada en 1999 por Neil Jordan con inda mayor fortuna en The End of the Affair; El rei y yo (1956, Walter Lang) con Yul Brynner y Rita Moreno, tamién numberoses vegaes llevada a la pantalla (la más reconocida, en 1946 con Rex Harrison y Linda Darnell, y la postrera en 1999 con Jodie Foster); Té y simpatía (1957, Vincente Minnelli) xunto a Leif Erikson y John Kerr nuna comedia d'alta sociedá sacada d'una esitosa obra de teatru; Namái Dios lo sabe (1957,[25] John Huston), nuna de les sos meyores interpretaciones al llau de Robert Mitchum; la inolvidable Tu y yo (Daqué pa recordar) (1957, Leo McCarey) en compañía d'un Cary Grant inmensu, col que formó una de les meyores pareyes cinematográfiques que se recuerden;[26] l'esitosu drama d'orixe teatral Meses separtaes (1958, Delbert Mann) con Burt Lancaster, David Niven, Rita Hayworth y Wendy Hiller llogrando un Óscar; "Bonos díes, murnia" (1958, Otto Preminger), sobre la famosísima novela de Françoise Sagan; y l'escelente Beloved Infidel (1959, Henry King), onde l'actriz fizo la so postrera gran interpretación de los años 50 como esposa del escritor Francis Scott Fitzgerald (Gregory Peck).

Con Burt Lancaster nel filme From Here to Eternity

Los más cinéfilos ver tamién en filmes de menor entidá pero onde l'actriz salvaba los sos papeles con elegancia, como Torbonada n'Oriente (1951, Charles Vidor) con Charles Boyer y Alan Ladd; La esposa suañada (1953, Sidney Sheldon) al llau de Cary Grant y Walter Pidgeon; La reina virxe (1953, George Sidney), ente Charles Laughton, Jean Simmons y Stewart Granger; Los héroes tamién lloren (1956, George Seaton), nun repartu que completen William Holden y Thelma Ritter; o Coloráu atapecer (1959, Anatole Litvak metanes Anouk Aimée y Yul Brynner.

Los años 60 amuesen que, magar la calidá de les sos interpretaciones y al ésitu comercial de les películes en qu'intervien, los críticos y l'academia de cine nun paecen dase por enteraos. Dalgunos de los sos meyores trabayos apaecen en títulos d'esta dómina tales como: The Sundowners (1960, Fred Zinnemann), de nuevu con Robert Mitchum pero agora nun sobeyosu drama d'aventures; Páxina en blancu (1960, Stanley Donen) nun duelu interpretativu con Cary Grant, Jean Simmons y Robert Mitchum; ¡Suspense! (1961, Jack Clayton) o la meyor versión de la célebre novela de Henry James Otra vuelta de tuerca, nel papel de madura institutriz nuna casona onde s'escuende un escuru secretu, xunto al gran Michael Redgrave y Pamela Franklin; Solombres de barruntu (1961, Michael Anderson), acompañando a Gary Cooper na so última apaición na pantalla; o La nueche de la iguana (1964, John Huston), sobre la obra teatral de Tennessee Williams, con Richard Burton, Ava Gardner y Sue Lyon.

Tamién destaquen, en menor midida, obres como Muyer ensin pasáu (1964, Ronald Neame), con John Mills y la so fía Hayley; El güeyu del diañu (1966, J. Lee Thompson), la fallida superproducción paródica Casino Royale (1967, John Huston, Robert Parrish, Val Guest), Temerarios del aire (1969, John Frankenheimer), al pie de Burt Lancaster y Gene Hackman; y The Arrangement (1969, Elia Kazan) con Kirk Douglas, Faye Dunaway y Hume Cronyn, siendo este l'añu en que se retiró.

Deborah Kerr n'Heaven Knows, Mr. Allison

A lo llargo de la so carrera foi candidata seis vegaes al Óscar, pero nun lu ganó en nenguna ocasión. Por ello, l'Academia de Cine concedió-y en 1994 un Óscar en reconocencia a tola so carrera.

A mediaos de los años 80, remaneció na TV británica, con dos notables papeles nel telefilme Xunta en Fairborough (el so últimu trabayu al pie de Robert Mitchum) y na recordada miniserie "A Woman of Substance" ("Toa una muyer"), basada nel Bestseller de 1979 escritu por Barbara Taylor Bradford que lleva'l mesmu nome que narra la vida d'Emma Harte.

Kerr tuvo casada per primer vegada ente 1945 y 1959, y tuvo dos fíos d'esti matrimoniu. Volvió casase en 1962 col escritor y guionista de Hollywood Peter Viertel. Viertel foi autor del guión de La reina d'África de John Huston lo mesmo que de Cazador blancu, corazón negru de Clint Eastwood. El matrimoniu vivió mientres la so última etapa en Suiza, anque dende los años 70 solíen pasar llargues estancies en Marbella.

Morrió'l martes 16 d'ochobre de 2007 a los 86 años d'edá na so casa de Suffolk, Inglaterra.[27] Carecía la enfermedá de Parkinson dende diba dellos años. El so vilbu Peter Viertel morrió en Marbella apenes 19 díes dempués.

Filmografía

[editar | editar la fonte]

Premios

[editar | editar la fonte]

Premiu Óscar

[editar | editar la fonte]
Añu Categoría Película Resultáu
1994 Óscar Honoríficu Ganadora
1960 Meyor Actriz The Sundowners Candidata
1958 Meyor Actriz Meses separaes Candidata
1957 Meyor Actriz Namái Dios sabe Candidata
1956 Meyor Actriz El rei y yo Candidata
1953 Meyor Actriz From Here to Eternity Candidata
1949 Meyor Actriz Edward, My Son Candidata

Premios BAFTA

[editar | editar la fonte]
Añu Categoría Película Resultáu
1964 Meyor Actriz Británica The Chalk Garden Candidata
1961 Meyor Actriz Británica The Sundowners Candidata
1957 Meyor Actriz Británica Tea and Sympathy Candidata
1955 Meyor Actriz Británica The End of the Affair Candidata

Globos d'Oru

[editar | editar la fonte]
Añu Categoría Película Resultáu
1964 Meyor Actriz - Drama Meses separaes Candidata
1958 Meyor Actriz - Drama Heaven Knows, Mr. Allison Candidata
1957 Meyor Actriz - Comedia o musical El rei y yo Ganadora
1950 Meyor Actriz Edward, My Son Candidata

Referencies esternes

[editar | editar la fonte]
  1. ↑ Afirmao en: Gemeinsame Normdatei. Identificador GND: 134823745. Data de consulta: 16 ochobre 2015. Llingua de la obra o nome: alemán. Autor: Biblioteca Nacional d'Alemaña.
  2. ↑ URL de la referencia: https://www.telegraph.co.uk/news/main.jhtml?xml=/news/2007/10/18/db1804.xml. Direición web d'archivu: https://web.archive.org/web/20071119071819/https://www.telegraph.co.uk:80/news/main.jhtml?xml=/news/2007/10/18/db1804.xml.
  3. ↑ 3,0 3,1 URL de la referencia: https://www.independent.co.uk/news/obituaries/deborah-kerr-395023.html.
  4. ↑ Identificador CONOR.SI: 48900195. Afirmao en: CONOR.SI.
  5. ↑ Identificador IMDb: ev0000003/1950.
  6. ↑ 6,0 6,1 New York Times (19 d'ochobre de 2007) (n'inglés). Deborah Kerr, Actress Known for Genteel Grace and a Sexy Beach Kiss, Dies at 86. https://www.nytimes.com/2007/10/19/movies/19kerr.html?_r=1&scp=1&sq=Deborah%20Kerr%20obituary&st=cse&oref=slogin. Consultáu'l 20 d'ochobre de 2007. 
  7. ↑ The Herald. «Deborah Kerr». Consultáu'l 19 de payares de 2007.
  8. ↑ Filmreference.com. «Deborah Kerr Biography (1921–2007)». Consultáu'l 29 d'ochobre de 2007.
  9. ↑ 'Road rage' killer's appeal win. BBC News. 30 de marzu de 2006. https://news.bbc.co.uk/1/hi/england/west_midlands/4861328.stm. 
  10. ↑ Killer's term cut. Worcester News. 5 d'abril de 2006. https://archive.worcesternews.co.uk/2006/4/5/408116.html. 
  11. ↑ 11,0 11,1 «Deborah Kerr». The Daily Telegraph (19 d'ochobre de 2007). Consultáu'l 20 d'ochobre de 2007.
  12. ↑ «Kerr, Deborah». International Dictionary of Film and Filmmakers. FindArticles.com. Archiváu dende l'mio_gx5212/is_2000/ai_n19128627 orixinal, el 28 de xunu de 2012.
  13. ↑ 13,0 13,1 13,2 13,3 Powell, Michael. A Life In Movies. Heinemann, 1986. ISBN 0-434-59945-X
  14. ↑ "Deborah Kerr, versatile British actress, dies at 86." International Herald Tribune. 18 October 2007. Retrieved on 11 November 2007.
  15. ↑ 15,0 15,1 15,2 Braun, Eric. Deborah Kerr. St. Martin's Press, 1978. ISBN 0-312-18895-1.
  16. ↑ 16,0 16,1 Associated Press (19 d'ochobre de 2007). «Actress Deborah Kerr Dies At 86». CBS News. Consultáu'l 10 de mayu de 2010.
  17. ↑ Granger, Stewart. Sparks fly Upward, p 87-88. Putnam, 1981. ISBN 0-399-12674-0.
  18. ↑ Buford, Kate. Burt Lancaster: An American Life. New York, New York: Knopf, 2001. ISBN 0-679-44603-6
  19. ↑ Clark, Mike. "Actress Deborah Kerr dies at age 86". USA Today. 18 October 2007.
  20. ↑ "From Here to Eternity actress Kerr dies." CNN. 18 October 2007
  21. ↑ Actress Deborah Kerr has died. Detroit Free Press. 18 d'ochobre de 2007. https://www.freep.com/apps/pbcs.dll/article?AID=/20071018/NEWS07/71018026/0/COL14. Consultáu'l 18 d'ochobre de 2007. 
  22. ↑ tribuna_obit.html "Peter Viertel, writer and scriptwriter, passed away yesterday in Marbella at 86 years." La Tribuna de Marbella. (c/o — Erik Y. Weems — translated and paraphrased from Spanish). 6 November 2007. Retrieved: 2007-11-19.
  23. ↑ «Between The Lines A filme by Michael Scheingraber». eeweems.com. Consultáu'l 10 de mayu de 2010.
  24. ↑ Baxter, Brian (18 d'ochobre de 2007). Deborah Kerr. Guardian Unlimited. https://www.guardian.co.uk/film/2007/oct/18/obituaries.news. Consultáu'l 10 de mayu de 2010. 
  25. ↑ Festival International de Cannes. «Cannes Film Festival Tribute» (in french). Consultáu'l 24 de payares de 2007.
  26. ↑ «British actress Kerr dies at 86». BBC News (18 d'ochobre de 2007). Consultáu'l 10 de mayu de 2010.
  27. ↑ Fina l'actriz Deborah Kerr a los 86 años

Enllaces esternos

[editar | editar la fonte]


Sacáu de «https://ast.wikipedia.org/w/index.php?title=Deborah_Kerr&oldid=4200934»