Tschechische Sprache

Tschechisch (čeština)
Verbreitig:	Tschechie, Slowakei, Östriich, Rumänie
Sprecher:	12 Millioone
Linguistischi Klassifikation:	Indogermanischi Sprooche Slawischi Sprooche Westslawischi Sprooche Tschechisch
Offizieller Status
Amtssprooch vo:	Tschechien Tschechie EU
Sproochchürzel
ISO 639-1	cs
ISO 639-2	(B) cze	(T) ces
ISO 639-3	ces

Die tschechischi Sprooch (tschechisch: český jazyk, bzw. čeština) ghöört zum westslawische Zwiig vo dr indogermanische Sproochfamilie.

S Tschechische wird vo öbbe 12 Millioone Mensche as Muetersprooch gschwätzt (Stand: 1999). Vo deene lääbe 10 Millioone z Tschechie, wo s d Amtssprooch isch. Sit em 1. Mai 2004 isch Tschechisch au en Amtssprooch vo dr EU. D Wüsseschaft, wo sich mit dr tschechische Sprooche befasst, isch d Bohemistik.

Tschechisch und Slowakisch stöön sich seer nooch und si geegesitig verständlig. Schriftlig underschäidet mä die bäide Sprooche am äifachste dur d Buechstaabe ř, ě und ů, wo s im Tschechische git aber nit im Slowakische. Hingeege git s d Buechstaabe ä, ľ, ŕ, ĺ und (e Difthong) ô nume im Slowakische. D Konsonantekombinazioone dz und dž und d Difthong ia, ie, iu, wo im Slowakischen hüfig si, chömme im Tschechische nume seer sälte oder überhaupt nit vor.

Wil iiri Sprooche sich so äänlig si und wil si e gmäinsami Gschicht häi und lang in dr Tschechoslowakei verbunde gsi si, verstöön d Slowake und d Tscheche enander relativ broblemloos, allerdings isch s dür die jüngeri Generazioon, wo noch dr Drennig vo dr Slowakei und Tschechie sproochlig sozialisiert worden isch, scho e chli schwiiriger. Drotzdäm wärde au hüte no offizielli Dokumänt in dr jewiilige Sprooch geegesitig zwüsche Tschechie und dr Slowakei automatisch anerkennt und s Rächt, ass mä im Amtsvercheer die anderi Sprooch daf verwände, git s explizit vo Gsetz us wie zur Zit vom gmäinsame Staat, und zwar im Minderhäitssproochegsetz 184/1999 Zb. in dr Slowakei und im Verwaltigsornigsgsetz 500/2004 Sb. z Tschechie. Z. B. dr Gustáv Slamečka, dr Vercheersminister in dr tschechische Übergangsregierig vom Jan Fischer, won e slowakische Staatsbürger isch, het die slowakischi Sprooch brucht, won er im Amt gsi isch. TV-Biidrääg in dr jewiils andere Sprooch wärde in bäide Länder unübersetzt gsändet. Es git Slowake, wo in Tschechie lääbe, won e Mischig us Tschechisch und Slowakisch schwätze, wo in dr Umgangssprooch „Tschechoslowakisch“ („českoslovenština“) häisst. E bekannts Bischbil dodrfür si d Reede vom letschte tschechoslowakische kommunistische Bresidänt Gustáv Husák („husákovština“) gsi.

Weblingg

 Commons: Tschechischi Sprooch – Sammlig vo Multimediadateie

 Wikibooks: Tschechisch — Lern- und Lehrmaterialie

• Usfüerligi tschechischi Grammatik, www.grammatiken.de
• Tschechisch, www.czech.cz
• Tschechisch–Deutsch/–Englisch/–Italienisch/–Französisch/–Spanisch/–Russisch-Wörterbuch, www.slovnik.seznam.cz
• Kontext-Wörterbuch Deutsch-Tschechisch mit 1,3 Mio. zweisprachigen Beispielsätzen, www.linguatools.de/deutsch-tschechisch/
• Deutsch–tschechisches Wörterbuch, www.i-dict.org
• Dastaturdriiber vom Sorbische Institut – Daarstellig vo tschechische Sonderzäiche über ere dütsche Standard-Dastatur (Driiber für Sorbisch) und en andere, abgläitete Driiber (won e chli liichter zum bruuche isch), www.serbski-institut.de/www.volny.cz
• Tschechisch-Deutsch-Wörterbuch, de.glosbe.com