Gaan na inhoud

Joaquin Phoenix

in Wikipedia, die vrye ensiklopedie
Joaquin Phoenix
'n Beeld van die betrokke persoonlikheid.
Phoenix in 2014 by die New Yorkse Rolprentfees.
Geboortenaam Joaquín Rafael Bottom
Geboorte 28 Oktober 1974 (1974-10-28) (50 jaar oud)
Río Piedras, Puerto Rico
Nasionaliteit Amerikaans
Beroep(e) Akteur, vervaardiger, musikant, aktivis
Aktiewe jare 1982–tans
Internet-rolprentdatabasis-profiel

Joaquin Phoenix (gebore as Joaquín Rafael Bottom, 28 Oktober 1974), voorheen bekend as Leaf Phoenix,[1] is ’n Amerikaanse akteur, vervaardiger, musikant en aktivis. Vir sy werk as ’n kunstenaar het hy ’n Grammy-, Golden Globe- en drie Oscar-benoemings ontvang.

Vroeë lewe

[wysig | wysig bron]

Joaquín Rafael Bottom is in Río Piedras, Puerto Rico, gebore as die derde oudste van die vyf kinders van Amerikaanse ouers. Sy ouer broer was die akteur River Phoenix (1970–1993).[2]

Sy pa, John Lee Bottom, was van Engelse, Duitse en Franse afkoms.[3][4] Sy ma, Arlyn Dunetz, is in The Bronx, New York, gebore as die dogter van Joodse ouers wie se familie uit Rusland en Hongarye geëmigreer het.[5] Phoenix se ouers is in 1969 getroud, waarna hulle by ’n godsdiensgroep, Children of God, aangesluit en deur Suid-Amerika gereis het.[3] Hulle het die groep verlaat en in 1978 na Amerika teruggekeer. Hulle het hul van na Phoenix verander na aanleiding van die Feniks, die mitologiese voël wat uit sy eie as verrys het. Dit was vir hulle simbolies van hul nuwe begin.[6]

In dié tyd het Joaquín homself Leaf begin noem omdat hy ’n natuurverwante naam wou hê soos sy sibbes. As kinderakteur het hy dié naam gebruik, totdat hy 15 was, en daarna weer die naam Joaquin gebruik.[7]

Om kos en geld vir die gesin te verskaf, het die kinders op straat en by verskeie talentkompetisies gesing en musiek gemaak.[8] Hulle is eindelik ontdek deur ’n kinderagent van Hollywood, Iris Burton, wat vir al vyf kinders werk gekry het, veral in advertensies en TV-programme.[9] Joaquin het hom as ’n kinderakteur gevestig en daarna saam met sy pa na Mexiko en Suid-Amerika gereis.[8]

Drie dae ná Joaquin se 19de verjaardag, op 31 Oktober 1993, het sy broer River per ongeluk ’n oordosis dwelms geneem. Hy het op die sypaadjie buite die nagklub The Viper Room in West Hollywood ineengesak en gesterf. Joaquin se oproep om hulp na 911 is herhaaldelik oor die radio en op TV gespeel.[10] In antwoord daarop het hy hom vir omtrent ’n jaar van die openbare lewe onttrek.[11]

Loopbaan

[wysig | wysig bron]
Phoenix in Mei 2000 by die Cannes-rolprentfees.

Phoenix het sy loopbaan begin deur in episodes van TV-reekse te verskyn saam met sy broer River Phoenix en suster Summer Phoenix. Sy eerste groot rol was in die komediedramafliek Parenthood (1989). In die tyd as kinderakteur het hy erkenning gekry as Leaf Phoenix. Hy het later weer sy geboortenaam gebruik en lof gekry vir byspelerrolle in verskeie prente, veral To Die For (1995) en Quills (2000).

Hy het internasionaal veral aandag getrek met sy rol as Commodus in die epiese 2000-rolprent Gladiator, waarvoor hy ’n Oscar-benoeming vir beste manlike byspeler gekry het. Hy is daarna vir Oscars benoem vir beste akteur vir sy rolle as Johnny Cash in Walk the Line (2005) en as Freddie Quell, ’n seksbehepte alkoholis-soldaat in die Tweede Wêreldoorlog, in die drama The Master (2012). Hy en sy broer River is steeds die enigste twee broers wat vir hul toneelspel vir ’n Oscar benoem is.

Van sy ander noemenswaardige prente is die satiriese Buffalo Soldiers (2001), die wetenskapsfiksieriller Signs (2002), die animasiefliek Brother Bear (2003), die historiese drama Hotel Rwanda (2004), die sielkundige riller The Village (2004), die dokumentêr Earthlings (2005), die romantiese drama Two Lovers (2008), die drama The Immigrant (2013) en die komediedrama Inherent Vice (2014).

Phoenix regisseer ook musiekvideo's en vervaardig rolprente en TV-programme. Hy het ook ’n album, die klankbaan vir Walk the Line, uitgereik en het daarvoor die Grammy vir beste saamgestelde klankbaan vir visuele media gewen.

Hy is ’n sosiale aktivis wat verskeie welsyn- en humanitêre organisasies steun. Hy is ook bekend as ’n voorstander van diereregte.[12][13]

Verwysings

[wysig | wysig bron]
  1. ↑ Contemporary theatre, film, and television, Gale Research Co., 2002, p. 213, ISBN 978-0-7876-6360-5 
  2. ↑ "The Phoenix Family". Sacred Loving Stream. Geargiveer vanaf die oorspronklike op 16 Mei 2016. Besoek op 21 Augustus 2007.
  3. ↑ 3,0 3,1 Roberta and David Ritz (Oktober 1995). "Strange Days" (in Engels). Us Magazine. Geargiveer vanaf die oorspronklike op 19 April 2020. Besoek op 1 September 2007.
  4. ↑ https://www.imdb.com/name/nm0001618/bio
  5. ↑ Naomi Pfefferman (12 April 2002). "The Days of Summer". Jewish Journal. Besoek op 1 September 2007.
  6. ↑ "PREMIERE April 1988" (in Engels). Aleka.org. Geargiveer vanaf die oorspronklike op 20 Oktober 2019. Besoek op 24 Augustus 2010.
  7. ↑ Paul Fischer (2000). "Gladiator". Dark Horizons. Geargiveer vanaf die oorspronklike op 17 Oktober 2015. Besoek op 22 Augustus 2007.
  8. ↑ 8,0 8,1 "Joaquin Phoenix- Biography". Yahoo! Movies. Besoek op 3 Julie 2013.[dooie skakel]
  9. ↑ Mary Rourke (10 April 2008). "Iris Burton, 77; Hollywood agent represented child actors". LA Times. Geargiveer vanaf die oorspronklike op 14 April 2008. Besoek op 11 April 2008.
  10. ↑ "Joaquin Phoenix 911 Call – River Phoenix – Viper Room" (in Engels). Geargiveer vanaf die oorspronklike op 12 November 2017. Besoek op 11 Januarie 2013.
  11. ↑ "Joaquin Phoenix". Glamour Magazine (in Engels). Geargiveer vanaf die oorspronklike op 4 Maart 2016. Besoek op 1 Mei 2015.
  12. ↑ "Joaquin Phoenix's Charity Work" (in Engels). Look To The Stars. Geargiveer vanaf die oorspronklike op 14 Junie 2012. Besoek op 22 Augustus 2007.
  13. ↑ "Fake leather please!". Daily News and Analysis. 14 November 2006. Besoek op 1 Desember 2012.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Joaquin_Phoenix&oldid=2543726"