ერეკლე II

ერეკლე II (დ. 7 გერგებათუთა, 1720, თელავი — ღ. 11 ღურთუთა, 1798, თექი, დასაფულებური რე მცხეთას, სვეტიცხოველიშ ოხვამეს) — 1744—1762 კახეთიშ, 1762—98 ქართლ-კახეთიშ მაფა, თეიმურაზ II-შ სქუა. ერეკლე II რდჷ ბაგრატიონეფიშ ჟირი ჸაშ გამნარყი. დიდამუში, თამარი, ვახტანგ VI-შ სქუა რდჷ, მუმამუში, თეიმურაზ II — ქართლიშ მაფა ერეკლე I-შ სქუა.

პოლიტიკური სიტუაცია

1744 წანას, თეიმურაზ II-ქ ქართლის გემაფჷ, ერეკლექ — კახეთის. XVIII ოშწანურაშ 40-იანი წანეფიშ მეწირილშო ქართლ-კახეთი ფაქტიურო ზოხორინელი ქიანა რდჷ ირანშე. ერეკლე II-ქ დო თეიმურაზ II-ქ ნადირ-შაჰიშ ღურაშ უკული ქართი ირანელეფშე გოჩოლეს, განჯაშ დო ერევანიშ სახანოეფი მუნეფიშ პატჷნობაშ თუდო გამშეჸონეს დო ხარკი ქიგიოდვეს. 1762 წანას თეიმურაზიქ დოღურუ დო ქართლ-კახეთიქ გინილჷ ერეკლეშ ხეშა, თაშ ქიანაშ გოართოიანაფაშო ართ კაბეტ ბიჯგიქ იჸუ გინოდგჷმილქ.

რეფორმეფი

ერეკლეშ მაფობაშ ბორჯის იჸუ გატარებულქ ბრელ რეფორმაქ. ერეკლექ სპეციალურ ჭკორპატჷნობაშ რეგლამენტაცია გამშეღჷ, ნამუთით აკობორკჷ ფეოდალეფი. ქჷდახორუ ნტერეფშე ნაოხრებუ აბანეფი. 1765 წანას გამშეღჷ კანონი, ნამუშ მეჯინათ ტყვეობაშე მუშ ინიციატივათ დარსხებულ ყაზახეფს ერძიებუდჷ დუდიშალა. ქჷდარცხუ მორიგობაშ პრინციპშე ეგაფილი ირიათოიანი ჯარი, ეკანწყუ დორხველობაშ ნოღური წესი, აკრძალჷ ტყვეეფით ვაჭრუა, გამშეღჷ ომაფეშ მანჯღვერობაშ ახალი სისტემა დო შხვა.

ერეკლე ოცადჷდჷ ეკონომიკაშ დო კულტურაშ აწოკჷნას. მუშ მაფობაშ ბორჯის გორჩქინდჷ ფაბრიკეფქ (სარკეშ, შანქარიშ, იარაღიშ). დიჭყეს ლინჯიშ, ორქო-ვარჩხილიშ, რკინაშ წარმება. მუქ გაახალჷ ზარაფხანა, ქჷდარცხუ სემინარიეფი, იბეშტუდჷ წინგეფი.

რუსეთიწკჷმა ურთიართალა

1783 წანას ერეკლექ ხე ქჷმაჭარჷ გეორგიევსკიშ ტრაქტატის. ერეკლეს ჯერდჷ, ნამდა რუსეთიწკჷმა ტრაქტატიშ ხემოჭარუა ხეს შეუნწყჷნდჷ ქართლ-კახეთიშ უკულიან აწოკჷნას, მარა გალეიან პოლიტიკურ სიტუაციაქ დითჷრჷ დო სპარსეთიქ კინ ქიდიჭყჷ ლჷმა ქართლ-კახეთიშ მუშ პროტექტორატიშ თუდო დართინაფალო. დაძაბულობაქ პიკის მიოჭირინდუ 1795 წანას. თე წანას აღა მახმად ხანქ 35 000 კოჩამ ჯარით დუდს გიანთხჷ ქართის. ერეკლექ წაგჷ ლჷმა დო იძულებულქ იჸუ ნოღა ქუდუტებუდუკონ. აღა მახმად ხანქ ნოღაშა გემშართჷნ, პრაქტიკულო ირფელ მოჯალაგუ. თეშნერ გეშქუმალა ქართის ბრელ ხანს ვა უძირუ — მუდგა იჭვედუნ, ჭვილი რდჷ, მუდგა დიხუედჷნ, ხილი რდჷ.

ათე სტატია მერკე რე.
თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათინ.