人

人類 地質年代： 更新世－近期
男人搭女人 西洋个男人，女人搭伊拉个小人
保護狀況
無危 （IUCN 3.1）
生物分類法
域： 真核域 Eukarya 界： 動物界 Animalia 門： 脊索動物門 Chordata 綱： 哺乳綱 Mammalia 目： 靈長目 Primates 科： 人科 Hominidae 屬： 人屬 Homo 種： 智人 H. sapiens
二名法
Homo sapiens (Linnaeus, 1758)
亞種
長者智人(Homo sapiens idaltu)（滅絕） 人(Homo sapiens sapiens)

人（學名：Homo sapiens，意思是「有智慧個人」），是乃朝地球个主宰物種，屬於靈長目人科人屬个直立行走物種。搭各許動物比，人个腦子發達險，有抽象思維、語言、自我意識加解決問題个能力，加上人身體是直立个，手好空出來做事幹，用傢伙也超過各許物種無數。到2011年11月止，世界人口達到70億，大約莫是來地球活過個人頭總數个6%。

線粒體DNA搭化石證明，智人大約來廿萬年前從東非獨立發展開來，經過兩趟走出非洲，散步到世界各地。並通過開發石器，獲得超過其餘交關物種个技巧搭優勢。到1萬年之前，開始發展處乃朝个文明。並形成社會階級。到五千年前，立在尼羅河流域搭兩河流域出現文明个高峰。之後文明立在世界各地開始發展。乃朝，人類是地球高頭數量龐大个一個族群，並立在大部分地區定居，人類个活動，拿地球个面貌深刻改變，並形成人類文明。

搭各許高等个靈長類動物樣，人類是社會性个。人用嘴、手勢搭文字表達自家，交換意見。人類會造複雜个社會結構，從家庭到國家。人搭人之間个社會交際形成廣泛个傳統、習俗、宗教制度、價值觀搭法律，个許聚隊構成人類社會个基礎。人類還有審美个觀念，咦加人類自我表達个欲望搭相對來講蠻大个腦子，造出宗教、藝術、語言、搭科學。

人類希望理解加改造環境，想用哲學、藝術、科學、神話搭宗教解釋自然界个現象。種一落頭地个好奇心發展出高級个傢伙搭技術。儘管人弗是獨个用傢伙个物種，不過人是曉得个獨个要得用火、要得著衣裳、要得煮吃搭各許高級技術个物種。

釋義

生物學上，人分徠哺乳綱靈長目人科人屬智人種（學名是Homo sapiens）里，是搭黑猩猩、大猩猩、猩猩還有長臂猿一樣屬於人猿總科个靈長目動物。人類搭各許靈長目動物个弗樣是人有徛直个身體、高度發展个腦子，咦加高度發展个腦子帶推理搭語言能力。人搭猿血緣近，動物學家德斯蒙德·莫利斯講笑講人是裸猿，還從各个角度論述人各種行為个起源。

精神層面上，人描述成是各種靈魂个概念用得來个，徠宗教里个許靈魂是認作搭神聖力量要勿存在有關；徠神話學里，人个靈魂也會馱來搭各許人型動物對照。比方人工智能要勿天使是嘸肉身个靈體，獸人要勿亞人是單清有欲搭膚淺个情緒。

行為學上來望人个特徵有：懂用語言，有多種複雜个互助性社會組織，歡喜發展複雜个科技，派生出各文化弗樣个信仰、傳說、儀式、社會規範。

徠哲學搭法律里向，人類、人、个體有弗樣个意義。頭前是講箇物種，後髖是講一個行為个體；譬如約翰·洛克个 Essay concerning Human Understanding II 27 搭伊曼努爾·康德个Introduction to the Metaphysic of Morals，个體便用來代表弗是人个動物，也好代表神秘動物、人工智能，搭外星人。徠神學搭宗教哲學里一個重要个議題便是上帝是弗是一個个體（望Great ape personhood）

漢字里，「人」个甲骨文是象形字，描寫一個側身徛里個人形，着意人个身體。從金文、小篆一落到楷書都保持箇種簡潔明快个線條組合。徠拉丁文里，humanus是homo个形容詞態，意思是人。古英文个man也有箇意思，譬如複合字wifman（女人），woman。

生命周期

一具人類骨骼標本

人个命從受精卵起。男性通常通過性交个方式讓女性受精，有兩記也好用人工受精。人徠生長初期謳作受精卵，來女性个子宮過約莫38个禮拜个胎兒期，便好生，胎兒從女性體內娩出後頭一垡靠自己敨起，同時謳作毛頭娃。一直到毛頭娃後，人嚇開受法律保護，少數地區嘸數從子宮裡个胎兒時期便開保來哉。人个命活到死止。

搭各許生物比，人生个過程複雜無多。超過24個鐘頭个痛苦分娩弗少見，有兩記畀小人搭娘妝傷妝死都有。到20世紀徠一許發達國家策有蠻高个生產成功率。徠各許發展當中國个生產是弗是老實快失敗還有爭議，因為箇許地區个女人講渠里用自然分娩法弗單蠻安全也蠻孬傷害產婦搭小人。

死道道帶來弗調泰个感覺要勿嚯（參望瀕死經驗）。辦喪事是人類社會个特色之一，通常也源於對死後世界个相信。不過一個人「長生」个方式嘸數便只從後人个膜拜搭繼承體現。

生理特徵

智能

達·芬奇个維特魯威人

智能是講生物一般性个能力，包括理解、計劃、解決問題、抽象思維、表達意念搭語言加學習个能力。智力測驗道道用來確定人个智力。一許研究者已經開對累積智能進行研究，箇種智力從人个協作來。計算機科學促進對人工智能領域个研究，許研究个目的是尋怎兒讓計算機以還智能化个方式運算。

情感

人个情感，最多是由大腦引起个。通過感官對外界个認識，形成自己个望法搭態度，形成自己个獨立判斷，逐漸深入，形成情感。

性活動

人類个性行為，除繁殖後代外，還有相當重要个社會功能，徠兩個个體間製造連繫。性慾除生理上个衝動，也帶來強烈个感情，正面（愛要勿高潮許），反面（譬如講嫉妒）个感情都有（參性慾）。

人類个性行為有自己一套約定俗成个規範。性活動會影響到社會規範進一步影響到性活動个表達方式。對性方面个選擇道道時也會跟當下个社會規範變，譬如講一許人會為宗教教義、社會輿論搭對真愛、貞操个理解弗肯有婚前性行為。一許文化好接受一夫多妻要勿一妻多夫，一許文化堅持一夫一妻（伊斯蘭教國家除外），一許文化嘸長期加固定个婚姻關係（譬如摩梭人个走婚制）。

人類社會裡，道道用一夫一妻制，也會因地方个習俗搭法律有弗樣，一許地方咦分父系社會搭母系社會。

身體

人類个表水徠文化搭藝術里都演重要个角色。人用化妝、服裝、珠寶，甚至是刺青許裝飾渠里个身體。髮型搭發色弗樣也暗示文化个弗同。一個人人范好看孬看對一個人个生活影響大險。

對食物飲水个需要也徠人類文化里表現出。嘸吃便會肚飢，嘸水便會口燥甚至脫水。肚飢搭脫水忒長久都會死；人類好兩個月日弗吃還活，最多三日弗吃水便會死（參望：肚飢、營養弗良）。

成人平均一日要睏七到八個鐘頭，小人九到十個鐘頭。年紀大點个睏六七個鐘頭光景。不過通常現代人都弗夠睏（參望睏覺弗足）。比方大學生道道只六個鐘頭。

人會老會生毛病，畀身體狀況下降。醫學是一門研究怎兒保持身體健康个科學。

飲食

早期个現代人用「採集打獵」來搜集吃个主要方式，箇方式結合固定个食物來源，植物搭真菌（譬如水果、穀物、塊莖，蘑菇）加狩獵各許動物。一般相信，現代人用火煮吃是由直立人分支起个。

人是雜食性動物，能消化植物搭動物。人有作雜食性動物个重要特徵，一個純肉食要勿純素食者身體會生缺乏症。純肉食者个飲食會導致壞血病，純素食者个飲食則會導致一定數量个營養素缺乏，包括維生素B₁₂。特別是維生素B₁₂，純素食者一定要經常補充 [1]。一許人會選擇戒吃一許要勿全部肉，一般會出於宗教，道德，生態保護，要勿健康許原因。

人類个飲食反映到地區文化里，也引致食物科學个發展。一般來講，人會根據平時貯勒人里个脂肪活兩到八個星期弗等，不過嘸水通常過弗落兩個星期。瑲朞，糧食弗足叫舊是一個嚴重个問題，年加年平均有30,0000人肚飢要死緊 [2]，兒童營養不良是一個世界性个問題 [3]，全球糧食分配還弗平均，肥胖疾病徠一許國家個人口裡達到猴高个比例。到一萬年前，人農業[4]開發，農業技術大大增加人類个糧食來源。箇導致人口快速增加搭城市个發展；人口密度一增加，過傳染病還快。徠弗樣个時間、地區，弗同民族，飲食文化大大个變化哉。

棲息處

人徠地球上除南極洲外大部分地區都長世有人宿活。大部分平原地區是人類人口密集个地區，世界上有2/3個人活勒到海岸線差弗超過500千米个區域裡。山地搭高原地區個人口少險。

語言

目前人類講个話大約有7200種，其中便只2000種光景有自己个文字。世界上分布最廣泛个語言有漢語 (中文)、英語、西班牙語、阿拉伯語、葡萄牙語、俄語、法語搭德語許。根據東英吉利大學個人口生態學家威廉·薩瑟蘭對6809種語言个分析來望，靠1/3个語言徠交關危險个地步，有46種語言便只一人懂。大部分語言是人類進化過程當中自然形成个，不過也有少數語言是徠某个時候人創起个，渠里謳作人工語言（要勿人造語言），比如世界語。

物種數量

世界人口密度點圖

人个物種數量講人口。世界人口超過70億，聯合國估計到2050年會達到90到100億。2004年，人口最多个國家是中國（13.13億）、印度（12億）、美國（3億）、印度尼西亞（2.23億）、巴西（1.81億）、巴基斯坦（1.77億）、尼日利亞（1.58億）、孟加拉國國（1.53億）、俄羅斯（1.42億）、日本（1.28億）、墨西哥（1.12億）許。世界人口密度最高个城市是澳門。

一般講來，發達國家搭地區個人口增長速度慢險，無其數國家還有負增長。欠發達地區个增長速度倒朆變慢。2000年到2005年，發達國家搭地區平均人口增長率是-0.2%.欠發達地區是1.5%。根據聯合國人口基金《2004年世界人口狀況》，2004年世界總人口是63.78億人。其中，發達地區是12.06億人。欠發達地區是51.72億人。2005年，全世界一分鐘大約259人生出。

人口老齡化是一個日益嚴重个社會問題。能界世界上人口老化最嚴重个國家是摩納哥，超過22%個人口徠65歲以上。意大利搭瑞典也超過17%。聯合國預測2050年，60歲以上个老年人口比例會從10.0%升到22.1%。

起源

進化論

根據進化論，人類起源是查爾斯·達爾文提出進化論後，逐漸發展起來个一種理論，認為人類起源是類人猿，從靈長類經過漫長个進化過程逐步發展起。箇理論得到絕大多數生物學家搭考古學家个支持，是能界科學界个主流理論，搭各許從進化理論發展出來个理論樣，箇理論共樣面對大量來自宗教界个挑戰，不過，羅馬天主教倒是支持箇理論，詳細望神導進化論。

創造論

根據創造論,人類是超自然力量譬如神、上帝要勿外來生物譬如外星人、平行世界個人造个。 前頭个是受宗教界特別是亞伯拉罕諸教支持信奉，後頭个是外星人造論帶頭，因渠搭上述个神創論衝突蠻小。 基督教搭渠起源个猶太教認為，男人是神用爛泥照自己个范子造起个，後咦取男人个一梗肋膨骨造个女人。 照中國傳統宗教，人類是女媧用爛泥造起。 各許原始宗教也都講人是神魔用爛泥造起个多。 外星人創造論相信個人忖，人搭地球各許生物忒弗樣哉，主張人是外星高等生物經過基因工程改良來个。 另外，人是外星人造个假忖也道道是小說搭動漫个題材。