Consey des Lingaedjes do Payis

Conseil des Langues Régionales Endogènes, CLRE

Les pretcheus a on raploû adjinçné på CLRE

Boket do papî d' priyaedje a èn etrevén CLRE po les djournêyes "Araedje di lére" 2009

Li Consey des Lingaedjes do Payis, e francès CLRE (Conseil des Langues Régionales Endogènes), c' esteut ene trope di djins raloyîs å ministere del culteure del Federåcion Walonreye-Brussele ki parpinséve li politike linwistike eneviè l' walon et les ôtes lingaedjes diléreces del federåcion.

Il a roté di 1990 a 2019.

Ovraedjes et fonccionmint

Li consey esteut eto responsåve des ôtes lingaedjes dilérins del sitindêye del Beldjike, la k' li Federåcion Walonreye-Brussele est mwaisse del culteure et di l' acsegnmint. Adon, li Consey s' ocupéve eto do picård, do gåmès, do lussimbordjwès, do ripouwaryin, do tchampnwès et do tîxhwès braibançon.

Li fonccionaire sicretaire end a stî lontins Jean-Luc Fauconnier; pu ç' fourit Nadine Vanwelkenhuyzen; al fén, Alix Dassargues.

Li CLRE a stî sovint critiké^{(pa ki ?)} pask' i n' s' ocupéve ki di pårti les sacwants liårds di subzides inte les soces k' estént bén avou les responsåves. Et nén mete so pî ene vraiye politike linwistike eneviè l' walon.

Pol CLRE, les lingaedjes dilérins divént dmorer diyalectålijhîs. Li seule kimon lingaedje sol kiminålté Walonreye-Brussele diveut esse li francès. Li walon ni dveut nén vni e prumî, mins esse todi metou come on parey ås ôtes «langues régionales endogènes», minme s' i rprezinte 70 % del sitindowe do payis la kel CLRE esteut competin.

C' esteut l' CLRE k' adjinçnéve et rinde les pris del Federåcion Walonreye-Brussele.

Après 2019

Li CLRE a stî replaecî, pa on decret do 27 di måss 2019, pa l' Consey do Lingaedje francès, des Lingaedjes do Payis et des Politikes linwistikes et pa l' session des lingaedjes do payis del Comission des Scrijhaedjes et do Live.

Do costé des fonccionaires responsåves do walon et des ôtes lingaedjes do payis, gn ava nou candjmint, avou l' wårdaedje des deus posses å ministere.

Les esperts di l' ancyin consey polént resse riprins dins l' novea sistinme (mins nén zels ostant).

Les subzides divèt esse dimandés pa les soces pol walon, tot prezintant les ovraedjes k' ele contèt fé rexhe. Davance, c' esteut sovint les minmes ecwårlaedjes ki dmorént sins trop bodjî dispu li skepiaedje do CLRE.

Lére eto

• Siervice des Lingaedjes do Payis
• Consey do Lingaedje francès, des Lingaedjes do Payis et des Politikes linwistikes