Esta páxina trata sobre a clase bacteriana Bacilli. Para o xénero bacteriano de nome similar ver Bacillus. Para as bacterias con forma de bastón ver bacilo.
Debe terse coidado co uso dos nomes Bacilli (que se traduciría para o galego como "bacilos"), Bacillus (que se traduciría como "bacilo") e o termo "bacilo"", usado para designar ás bacterias alongadas con forma de bastonciño. Neste caso a ambigüidade pode evitarse utilizando os nomes científicos e non o vernáculo. Téñase presente o seguinte:
Bacilli é un taxon bacteriano con categoría de clase. Dentro del hai bacterias con forma de bastón (bacilos) pero tamén cocos.
Bacillus é o nome dun xénero bacteriano que pertence á clase Bacilli, polo que o seu significado é moito máis restrinxido, xa que a clase Bacilli comprende varios xéneros.
Bacilo é o termo que se aplica ás bacterias que teñen unha determinada morfoloxía, concretamente ás que son alongadas con forma de bastonciño. Hai bacterias con esta forma en varias clases taxonómicas bacterianas e non só en Bacilli. Por exemplo, E. coli é un bacilo que non pertence á clase Bacilli.
