ក្បាលពោះលោកអ្នក រីកធំលើសកំណត់ហើយមែនទេ? តោះ! ព្យាយាមសាកវិធីទាំង ០៦ នេះ ដើម្បីបានរាងស្អាតមកវិញ…
(សុខភាព)៖ យើងអាចស្រស់ស្អាតសង្ហារមកវិញបាន ដោយប្រើតែវិធីសាមញ្ញៗប្រសិនអ្នកសំរេចចិត្តថា អ្នកនឹងធ្វើការសម្រកក្បាលពោះរបស់អ្នក ហើយអ្នកត្រូវការឲ្យបានប្រសិទ្ធភាពយ៉ាងឆាប់រហ័ស នេះគឺជាពេលវេលាសំរាប់អ្នកអនុវត្តន៍ហើយ។
ខាងក្រោមនេះគឺជាវិធីមួយចំនួន ដែលអាចជួយឲ្យអ្នកមានក្បាលពោះរាបស្មើបានយ៉ាងឆាប់រហ័ស ប៉ុន្តែអ្នកក៏ត្រូវព្យាយាមតាំងចិត្តឲ្យមុតមាំដែរ៖
១៖ មុខញុំាអាហារ ត្រូវទទួលទានទឹកមួយកែវសិន ឲ្យមានមុន ៥នាទី។ ធ្វើបែបនេះ ជាវិធីបង្ការដ៏មានប្រសិទ្ធភាព ដើម្បីរារាំងអ្នក មិនឲ្យញុំាអាហារលើសកម្រិត។
២៖ ផ្លាស់ប្តូររបបអាហាររបស់អ្នក។ ទទួលទានបន្លែ និងផ្លែឈើឲ្យបានច្រើន និងជៀសវាងទទួលទានអាហារណា ដែលមានជាតិធាត់ច្រើនដូចជា សាច់ (លើកលែងត្រី) និងម្សៅបំពងខ្លាញ់។ អ្នកគួរតែបែរមទទួលទាន គ្រាប់ធុញ្ញជាតិ នំបុ័ងធ្វើពីស្រូវសាលី និងបាយអង្ករសម្រូបឲ្យបានឆ្អែត ជាជាងញុំាម្ហូបដែលមានជាតិសាច់ច្រើន។
៣៖ ចូរធ្វើលំហាត់ប្រាណឲ្យបានយ៉ាងហោចណាស់ ៣ ឬ៤ដងក្នុងមួយសប្តាហ៍ (ម្តងៗយ៉ាងតិចកន្លះម៉ោង) ដោយអ្នកអាចទៅហែលទឹក ឬ ទៅក្លឹបហាត់ប្រាណ ពីព្រោះសកម្មភាពទាំងនេះ អាចធ្វើឲ្យអ្នកមានក្បាលពោះរាបស្មើបានយ៉ាងលឿនបំផុត។
៤៖ ទទួលទានអាហារដែលមានកាឡូរីទាប។ ជាធម្មតា ប្រសិនបើអ្នកប្រើប្រាស់កាឡូរី ២,០០០កាឡូរីក្នុងមួយថ្ងៃ អ្នកគួរតែកាត់បន្ថយវាមកត្រឹមតែ ១,៥០០កាឡូរី។
៥៖ បើសិនជាអ្នកចូលចិត្តញុំាគ្រឿងកំប៉ុងផ្អែមៗដើម្បីប៉ូវកម្លាំង គួរណាស់ប្តូរមកទទួលទានទឹកអំពៅស្រស់ តែបៃតងក្រូចឆ្មា និងក្រូចផាសិនដាក់ស្ករតិចល្មម នោះមិនយូរប៉ុន្មាន អ្នកនឹងទទួលតែរបស់ធម្មជាតិដោយឯកឯង។
៦៖ អ្នកអង្គុយធ្វើការយូរ គួរកាត់បន្ថយការទទួលទានទឹកកក និងទឹកត្រជាក់ខ្លាំង ព្រោះវាមិនល្អសម្រាប់សុខភាពឡើយ ដោយអ្នកអាចប្តូរមកទទួលទានទឹកក្តៅអ៊ុនៗវិញ ឬទឹកធម្មតាមិនក្តៅ មិនត្រជាក់ ដើម្បីរក្សាគីឡូ និងបន្ថយគីឡូជាងមុនផងក៏ថាបាន។
សូមចងចាំថា វិធីខាងលើនេះងាយៗពិតមែន ប៉ុន្តែបើអ្នកមិនអាចតាំងចិត្តឲ្យបានមោះមុត អនុវត្តន៍បានជាប់លាប់ទេនោះ អ្នកមិនអាចទទួលបាននូវអ្វី ដែលអ្នកប៉ងប្រាថ្នានោះឡើយ៕
